سەرۆکوەزیرانی سووریا داوای بەڕێوەچوونی هەڵبژاردنی ئازاد دەکات

ئاڤا نیوز

 

دوای ئەوەی دیمەشقی پایتەختی سووریا کەوتەدەست هێزەکانی ئۆپۆزیسیۆن و کۆتایی بەدەسەڵاتی بەشار ئەسەد هێنرا، محەممەد جەلالی، سەرۆکوەزیرانی سووریا، داوا دەکات "هەڵبژاردنێکی ئازاد" لەو وڵاتە بەڕێوەبچێت.

 

ڕاگەیێنراوی فەرمی: محمەمەد جەلالی, سەرۆکوەزیرانی سووریا ڕایگەیاند، لەگەڵ ئەبو محەممەد جۆلانی، سەرکردەی دەستەی تەحریرولشام گفتوگۆی کردووە تا پڕۆسەی ڕادەستکردنی دەسەڵات خێراتر بکرێت.

 

بۆچوونی لایەنی بەرامبەر: لای خۆشیەوە جۆلانی ڕایگەیاندووە، تاکاتی ڕادەستکردنی فەرمیی دەسەڵاتی سووریا، دامەزراوەکانی دەوڵەت لە ژێر دەسەڵاتی سەرۆکوەزیراندا دەمێننەوە.

 

ئەوەی پێویستە بیزانیت: سەرۆکوەزیرانی سووریا، سەبارەت بە چارەنووسی بەشار ئەسەد گوتوویەتی شەوی ڕابردوو دوایەمین پەیوەندیی تەلەفۆنی لەگەڵ بەشار ئەسەد ئەنجام داوە و هیچ زانیارییەکی سەبارەت بە شوێنی ئێستای نییە.