چوار سەرۆکایەتییەکەی عێراق و لایەنەکان: ڕێز لە بژاردەی گەلی سووریا دەگرین

ئاڤا نیوز 

 

کۆبوونەوەی چوار سەرۆکایەتییەکەی عێراق و هاوپەیمانیی ئیدارەی دەوڵەت لە بەغدا کۆتاییهات و ڕایانگەیاند، ڕێز لە بژاردەی گەلی سووریا دەگرن و جەختیش لە پاراستنی ئاسایش و یەکێتی خاکی سووریا دەکەنەوە.

 

وێنە گەورەکە: دوای تێپەڕبوونی نیو سەدە لە حکومڕانی بنەماڵەی ئەسەد و 13 ساڵ بەسەر خۆپێشاندانەکانی سووریادا، بەرەبەیانی ڕۆژی یەکشەممە (08-12-2024) ئۆپۆزیسیۆن چەکداریی ئەو وڵاتە، دیمەشقی پایتەختی کۆنتڕۆڵ کرد و بەشار ئەسەد سەرۆکی سووریاش بەرەو ڕووسیا هەڵهات.

 

ئەوەی پێویستە بیزانیت: لە کۆشکی سەرۆکایەتیی بەغدا و بەئامادەبوونی لەتیف ڕەشید سەرۆککۆمار، محەممەد شیاع سوودانی سەرۆکوەزیران، مەحموود مەشهەدانی سەرۆکی پەرلەمان و فایەق زێدان سەرۆکی ئەنجوومەنی باڵای دادوەریی عێراق و بەبەشداریی سەرکردەی لایەنەکانی ناو هاوپەیمانیی ئیدارەی دەوڵەت کۆبوونەوەیەک لەبارەی گۆڕانی دەسەڵات لە سووریا بەڕێوەچوو.

 

ڕاگەیێنراوی فەرمی: نووسینگەی ڕاگەیاندنی سەرۆکوەزیرانی عێراق بڵاوی کردەوە:

 

• جەختکرایەوە لەسەر چڕکردنەوەی هەوڵەکان بۆ پاراستنی ئاسایشی سنوورەکانی عێراق و سووریا، بەجۆرێک ڕێکارەکان دڵنیایی بە گەلی عێراق بدات کە لەهەر هەڕەشەیەکی لەناکاو پارێزراو دەبێت.

 

• هەڵوێستی عێراق نەگۆڕە و بەپێویستی دەزانن یەکگرتوویی و ئارامی سووریا پارێزراوبێت و ڕێزیش لە سەروەریی و بژاردەی گەلی سووریا دەگرن بۆ ژیانێکی ئارام و پڕ لە ئاسایش.

• لایەنەکان پێداگربوون لەسەر یەکهەڵوێستی عێراق لەبارەی ڕووداوەکانی ناوچەکە، هاوکات نەخشەڕێگایەکیشیان بۆ داهاتووی پەیوەندییەکانی عێراق و سووریا داڕشتووە.