سوودانی: شوێنپێی تیرۆر لە عێراق نەماوە

ئاڤا نیوز

 

سەرۆکوەزیرانی عێراق لە ساڵیادی شکستپێهێنانی داعش لە گوتارێکدا ئاماژەی بۆ ئەوە کرد، داعش لە عێراق نەماوە و سەرکەوتنی عێراق بەسەر داعش مێژوویی بوو. هاوکات جەختی کردووە لە نزیکەوە چاودێریی دۆخی سووریا دەکەن و پێویستە ڕێز لە هەڵبژاردەکانی گەلی سووریا بگیرێت.

 

وێنە گەورەکە: سەرۆکوەزیرانی عێراق بە بۆنەی حەوتەمین ساڵیادی کۆنترۆڵکردنەوە خاکی عێراق لە ژێر دەستی ڕێخکراوی چەکدارانی داعش گوتارێکی پێشکەش کرد و وتی: ڕۆژی سەرکەوتن، ڕۆژێکی مێژوویی بوو بۆ گەلانی عێراق.

 

ڕاگەیێنراوی فەرمی: محەممەد شیاع سوودانی، سەرۆکوەزیرانی عێراق ڕایگەیاند: برا و هاوڕێیەکانمان لەگەڵمان وەستانەوە لە ڕووبەڕووبوونەوەی تیرۆر, چونکە عێراقییەکان لە جیاتی جیهان بەرەنگاری هزری بەلاڕێداچوو بوونەوە، سەرکەوتنی عێراقییەکان بەسەر تیرۆر سەرکەوتنی مرۆڤایەتی بوو بەسەر هەڕەشەیەک کە ناوچەکە و جیهانی تۆقاندبوو. تیرۆر شوێن پێی لە عێراق نەماوە و شانەکانی جگە لە هەڵاتن و دۆڕان هیچی دیکەیان بۆ نەماوە بەرامبەر هێزە ئەمنییەکانمان. 

 

سوودانی سەربارەت بە دۆخی سووریاش وتی: ئێمە لە نزیکەوە چاودێریی دۆخی سووریا دەکەین هیوادارین هەموو وڵاتانی ناوچەکە و جیهان بە ئەرکی خۆیان هەستن بۆ پاراستنی ئاسایش و سەقامگیریی سووریا و سەلامەتیی گەلەکەی و هەڵبژاردنەکە بۆ ئەوان جێبهێڵن و  ڕێز لە ئیرادەی ئازادی بگیرێت.

 

ئەوەی پێویستە بیزانیت: لە ساڵی 2014 چەکدارانی ڕێکخراوی داعش چەند شارێکیان لە عێراق داگیرکرد دیارترینیان شاری موسڵ بوو، دوای سێ ساڵ و لە 09-12-2017 ئەو ڕێکخراوە لەسەر دەستی پێشمەرگە و هێزە ئەمنییەکانی عێراق بە هاوکاریی هێزەکانی هاوپەیمانی نێودەوڵەتی بۆ بەرەنگاربوونەوەی تیرۆر شکستی هێنا، بەڵام تائێستاش شانە نوستووەکانی داعش چالاکییان لەسەر خاکی عێراقدا ماوە.