لە هەرێمی کوردستان کار بۆ فراوانکردنی پڕۆژەی حەوزەکانی ئاوی ژێر زەوی دەکرێت

ئاڤا نیوز

 

دوای جێبەجێکردنی پڕۆژەی پڕکردنەوەی حەوزەکانی ئاوی ژێر زەوی و کاریگەرییە ئەرێنییەکانی، بەڕێوەبەری گشتیی سەرچاوەکانی ئاو لە وەزارەتی کشتووکاڵ دەڵێت، 'بەرنامەمان هەیە پڕۆژەکە بە سەرتاسەری بکەین'.

 

وێنە گەورەکە: گۆڕانی کەشوهەوا کاریگەری لەسەر کەمبوونی ئاوی سەر زەوی و ژێر زەوی دروستکردووە، ئەمەش وەک مەترسییەکی جیهانی دەبینرێت، هەرێمی کوردستانیش لەم مەترسییە بەدەر نییە، بۆیە کار بۆ کەمکردنەوەی مەترسییەکان لە ڕێگەی پاراوکردنی ئاوی ژێر زەوی دەکات.

 

لێدوانی فەرمی: د.کاروان سەباح، بەڕێوەبەری گشتیی سەرچاوەکانی ئاو لە وەزارەتی کشتووکاڵ، بە ئاڤا نیوزی ڕاگەیاند: لە ماوەی ساڵێکدا پڕۆژەی پاراوکردنی حەوزەکانی ئاوی ژێر زەوی (ڕیچارج) لە دارەتوو، بنەسڵاوە، تارین، چیای شەکرۆکە جیێبەجێکراوە و کاریگەری باشیان هەبووە، ئەمەش هانمان دەدات بۆئەوەی پڕۆژەکە لە هەرێمی کوردستان بە سەرتاسەری بکەین.

 

بەڕێوەبەری گشتیی سەرچاوەکانی ئاو گوتیشی:  لە گوندی کۆڵەک پڕۆژەیەکی دیکەی پاراوکردنی ئاوی ژێر زەوی لە قۆناغی جێبەجێکردندایە و لە دوو هەفتەی داهاتوودا تەواو دەبێت، بەم جۆرەش پێنج پڕۆژەی پڕکردنەوەمان دەبێت.

 

کاریگەریی و لێکەوتەکانی: لە چیای شەکرۆک لە نزیک بیرەکانی چاودێری لە پڕۆژەکە، پێشتر ئاستی قوڵی بیری ئاو 13 بۆ 14 مەتر بوو، بەڵام ئێستا ئاستی هەشت بۆ نۆ مەترە، واتە ئاستی ئاوی ژێر زەوی چوار مەتر بەرزبووەتەوە.

 

مەترسییە پێشبینیکراوەکان: ئاماژەکانی گۆڕانی کەشوهەوا بۆ داهاتوو کاریگەری لەسەر ناوچەکە و بەتایبەت کوردستان دەبێت.

 

ئەوەی پێویستە بیزانیت: لە ڕۆژی 12-11-2024، نوێنەرانی حکومەتی هەرێمی کوردستان بەشدارییان لە کۆنفرانسی کەشوهەوا لە باکۆ کرد، و بوونە ئەندامی چەند پلاتفۆرمێک، لەو ڕێگەیەوە داتای پێشبینییە دوور مەوداکانی کەش و هەوا بۆ ئامادەکاری و ڕووبە ڕووبوونەوەی مەترسییەکان وەردەگرن.