یەکەی نیشتەجێبوون بۆ کەسوکاری شەهیدان و جینۆساید و زیندانیانی سیاسی دروست دەکرێت

ئاڤا نیوز

 

بەبڕیاری سەرۆکوەزیران مەسرور بارزانی، یەکەی نیشتەجێبوون بۆ کەسوکاری شەهیدان، جینۆساید و زیندانیانی سیاسی قۆناغ بە قۆناغ لە ناوچەکان دەستپێدەکرێت، ئەو خێزانانە دەگرێتەوە کە پێشتر لە وەرگرتنی یەکەی نیشتەجێبوون و زەوی سوودمەند نەبوون.

 

وێنە گەورەکە: قۆناغی یەکەمی بوونیادنانی ئەو یەکانە لە زاخۆ دەستپێکرد و ئەمڕۆ چوارشەممە لیژنەیەکی باڵا لە وەزارەتەکانی شەهیدان و ئەنفاڵکراوان و وەزارەتی شارەوانی و گەشتوگوزار سەردانی ئەو زەوییانەیان کرد کە بۆ بوونیادنانی یەکەکان دابینکراون. لیژنەکە سەردانی سەرجەم شار و شارۆچکەکانی هەرێمی کوردستان دەکەن و بەدواداچوون بۆ زەوییەکان دەکرێت، هەنگاوی داهاتوو دەست بە بوونیادنان دەکرێت.

 

زانیاریی زیاتر: لە هەنگاوی یەکەمدا سەدان یەکەی نیشتەجێبوون بەسەر کەسوکاری شەهیدان، جینۆساید و زیندانیانی سیاسی بەبێ بەرامبەر دابەش دەکرێت.

 

لێدوانی فەرمی: ئیدریس عەبدوڵڵا، جێگری سەرۆکی شارەوانی زاخۆ بە ئاڤا نیوزی ڕاگەیاند:

• لە سنووری زاخۆ 15 دۆنم زەوی ئامادەکراوە لەسەر ڕووبەری 63 هەزار مەتر دووجا کە یەکەی نیشتەجێ بوون دروست دەکرێت".

 

• ئەو یەکانە لەلایەن دەزگای خێرخوازی بارزانی و دەستەی وەبەرهێنان دروستدەکرێت بەشێکیان لەسەر بودجەی حکومەتی هەرێمی کوردستان دەبێت.

 

لەلایەکی دیکەوە: ناڤسەر نووری، بریکاری وەزارەتی شەهیدان و ئەنفاکراوان بە ئاڤای گوت، "ئەو کەسانەی لە وەرگرتنی زەوی سوودمەند بوون، ئەم پڕۆسەیە نایانگرێتەوە، بەگوێرەی پلانێک سەرجەم کەسوکاری شەهیدان و ئەنفالکراوان، جینۆساید و زیندانیانی سیاسیی زەوی یان یەکەی نیشتەجێبوون وەردەگرن".

 

باکگراوند: ڕۆژی 14-09-2024 سەرۆکوەزیران مەسرور بارزانی کلیلی زیاتر لە 540 یەکەی نیشتەجێبوون بەسەر کەسوکاری شەهیدانی شەڕی داعش دابەش کرد، کە لەلایەن دەزگای خێرخوازی بارزانی بەهەماهەنگی دەستەی وەبەرهێنان ئامادەکرابوون.