وڵاتینامەی سووری لە 700 هەزار ئێرانی و عێراقی وەردەگیرێتەوە

ئاڤا نیوز 

 

بەڕێوەبەرایەتیی باری كەسیی دیمەشق ڕایدەگەیێنێت، وڵاتینامەی سووری لە نزیكەی 700 هەزار هاووڵاتی عێراقی و ئێرانی وەردەگیرێتەوە كە لەكاتی حكومڕانی حكوومەتی ڕووخاوی بەشار ئەسەد پێیان درابوو.

وێنە گەورەكە: لە سەردەمی حكومڕانی بەشار ئەسەد بۆ مەرامی پشتیوانیی سیاسی و سەربازی، حكومەتی پێشوو وڵاتینامەی سووری بە هاووڵاتیانی ئێرانی و وڵاتانی دیكە دەبەخشی، كە بەگوێرەی زانیارییەكان لە ماوەی 13 ساڵی هەڵگیرسانی شەڕ و گرژییەكانی ئەو وڵاتە، نزیكەی 700 هەزار هاووڵاتی عێراقی و ئێرانی لە چوارچێوەی میلیشیا چەكدارەكانی سەر بە حكومەتی دیمەشق، وڵاتینامەی سوورییان پێدراوە.

ڕاگەیێنراوی فەرمی: كارگێڕی تۆماری باری كەسیی دیمەشق ڕاگەیێنراوێكی بڵاوكردووەتەوە و تێیدا هاتووە، كەسانی بە ڕەچەڵەک ئێرانی و عێراقی لە ماوەی 13 ساڵی ڕابردوودا بۆ پشتیوانیكردن لە ڕژێمی لەكارلادراو، بەشێوەیەكی نایاسایی مافی هاووڵاتینامەیان پێدراوە و سەرجەم ئەو مامەڵانە بە پووچەڵ هەژماردەكرێن.

 

زانیاریی زیاتر: بڕیاری هەڵوەشاندنەوەی پێدانی وڵاتینامەی سووری لە ڕۆژی یەكشەممەی داهاتوو 15-12-2024 ـەوە دەكەوێتە بواری جێبەجێكردن و هەموو ئەو كەسانەی لە ماوەی ساڵانی ڕابردوودا وڵاتینامەیان وەرگرتووە، پووچەڵ دەكرێتەوە.