هاکان فیدان: ئامانجی تورکیا لە سووریا نەهێشتنی یەپەگەیە

ئاڤا نیوز

 

وەزیری دەرەوەی تورکیا ڕایگەیاند، ئامانجی ستراتیژیی وڵاتەکەی لە سووریا، نەهێشتنی هێزی یەکینەکانی پاراستنی گەل (یەپەگە)یە.

 

لێدوانی فەرمی: هاکان فیدان، وەزیری دەرەوەی تورکیا لە چاوپێکەوتنێکدا لەگەڵ 'کەناڵی ئێن تیڤی' جارێکی دیکە جەخت دەکاتەوە، ئامانجی وڵاتەکەی لە سووریا دەرکردن و نەهێشتنی هێزی یەکینەکانی پاراستنی گەل (یەپەگە)یە لە سووریا و دەڵێت، "پێویستە بە زووترین کات سووریا بەجێبهێڵن یان چەکەکانیان دابنێن". هاوکات داوا لە حکومەتی کاتی سووریا دەکات دان بە یەپەگەدا نەنێت.

 

ئەمەش بزانە: ئەمریکا و تورکیا لەبارەی هێزەکانی سووریای دیموکرات ناکۆکن. ئەمریکا دەیەوێت هەسەدە ڕۆڵی لە داهاتووی سووریا هەبێت و جیای دەکاتەوە لە پارتی کرێکارانی کوردستان. بەڵام تورکیا هەمیشە هەسەدە بە یەپەگە ناودەبات، ئەوەش وەک ئاماژەیەک کە هیچ جیاوزییەکیان نییە.

 

لەلایەکی دیکەوە: یەشار گولەر، وەزیری بەرگریی تورکیا کە لە کۆبوونەوەی پڕۆژەیاسای بودجەی 2025ـی پەرلەمانی وڵاتەکەی بەشداریی کردبوو، گوتی: "بەهیچ شێوەیەک ڕێگە نادەین هەسەدە سوود لە دۆخی سووریا  وەربگرێت، ئەو ناوچانەی لەلایەن گرووپە چەکدارەکانی ئۆپۆزسیۆنەوە کۆنترۆڵكرا، هەسەدە بە ناچاری پاشەکشەی لێکرد".

 

زانیاریی زیاتر: ڕۆژی 8-12 دەسەڵاتی 53 ساڵەی بنەماڵەی ئەسەد لە سووریا کەوت و هێزەکانی ئۆپۆزیسیۆن چوونە دیمەشقی پایتەخت. وەزیری دەرەوەی تورکیا دەڵێت: پێشتر تورکیا داوای لە ڕووسیا و ئێران کردبوو کە دەستتێوەردانی سەربازی لە کاتی هێرشی گرووپە چەکدارەکانی ئۆپۆزیسۆن بۆ سەر دەسەڵاتی بەشار ئەسەد نەکەن".