عەبدولحەکیم بەشار: پەکەکە دەیەوێت چارەسەری پرسی کورد لە سووریا بەلاڕێدا ببات

ئاڤا نیوز

 

جێگری سەرۆکی هاوپەیمانی نیشتمانی سووریا دەلێت: خەڵک و دەسەڵاتی نوێی سووریا زۆر ئەرێنی لە پرسی کورد دەروانن، تەنانەت لە نێو هێزەکانی تەحریرولشامدا بەشی تایبەت بە کورد هەیە بە مەبەستی ناساندنی پرسی کورد بە خەڵک.

 

وێنە گەورەکە: لە دوای ڕووخانی رژێمی بەشار ئەسەد لە سووریا، کوردانی ڕۆژئاوای کوردستان داوای یەکگرتوویی سەرجەم هێزە کوردییەکان لە باکور و ڕۆژهەڵاتی سووریا بە تایبەت لە نێوان ئەنەکەسە و هەسەدە دەکرێت.

 

لێدوانی فەرمیی: عەبدولحەکیم بەشار، جێگری سەرۆکی هاوپەیمانی نیشتمانی سووریا بە ئاڤا میدیای ڕاگەیاند: لەگەڵ شۆڕشی سووریا، شۆڕشێک لە مێشکی خەڵکدا دروست بووە، چونکە خەڵک و دەسەڵاتی سووریا زۆر ئەرێنی لە پرسی کورد دەڕوانن، بۆیە دەبێت ئێمەش وەک کورد بە ئاگاییەوە مامەڵە لەگەڵ دۆخەکەدا بکەین.

 

جێگری سەرۆکی هاوپەیمانی نیشتمانی سووریا ئەوەشی گوت: ئەنەکەسە لە ساڵی 2011ـەوە ئامادەیی دەربڕیوە لەگەڵ هێزە کوردییەکان گفتوگۆ بکات، بەڵام بەداخەوە تا ئەو کاتەی پەکەکە هەبێت، ڕێگە نادرێت کورد یەکگرتوو بێت. هاوکات دەڵێت، ئێستا تاکە کێشە بۆ ڕۆژئاوای کوردستان، جگە لە پەکەکە هیچ لایەنێکی دیکە نییە.

 

قووڵتر: عەبدولحەکیم بەشار ئاماژە بەوەش دەکات، پەکەکە دەیەوێت چارەسەری پرسی کورد لە سووریا بەلاڕێدا ببات، لە کاتێکدا چارەسەرییەکە تەنیا لەگەڵ خەڵکی سووریایە، نەک ناوچە و لایەنی دیکە.