شاندی هەرێمی كوردستان لەگەڵ وەزارەتی دارایی عێراق کۆبووە

ئاڤا نیوز

شاندی حكومەتی هەرێمی كوردستان بۆ پرسی مووچە و بودجە لە بەغدا لەگەڵ وەزیری دارایی حكومەتی عێراق کۆبووەوە.

 

وێنە گەورەكە: سەرەڕای تێپەڕبوونی زیاتر لە 45 ڕۆژ، هێشتا مووچەی مانگی ئۆكتۆبەری مووچەخۆرانی هەرێمی كوردستان دابەش نەكراوە، شاندێكی حكومەتی هەرێمی كوردستان بۆ چارەسەركردنی گرفتی سێ مووچەی كۆتایی ئەمساڵ و بودجەی ساڵی 2025، سەردانی بەغدایان كردووە.

 

لێدوانی فەرمی: ئەندامێکی شاندی حکومەتی هەرێمی کوردستان بە ئاڤا میدیای ڕاگەیاند: شاندەكەی ھەرێمی کوردستان پێكهاتوون لە ئاوات جەناب، وەزیری دارایی و ئابووریی حكومەتی هەرێمی كوردستان و سەرۆكی شاند، دکتۆر ئومێد سەباح، سەرۆكی دیوانی ئەنجوومەنی وەزیران، دکتۆر ئامانج ڕەحیم، دکتۆر عەبدولحەکیم خەسرۆ، ستافی تەكنیكی وەزارەتی دارایی ھەرێمی کوردستان، فارس عیسا سەرۆکی نوێنەرایەتیی حکومەتی ھەرێمی کوردستان.

 

زانیاری بەدەستهاتوو: شاندەكەی هەرێمی كوردستان لە دیوانی وەزارەتی دارایی عێراق لەگەڵ تەیف سامى، وەزيرى دارایی عێراق و ڕێباز حەملان بریکاری وەزارەت و ستافی وەزارەتی دارایی عێراق لەبارەی چارەنووسی سێ مووچەکەی کۆتایی ئەمساڵ گفتوگۆیان کرد.