چەکدارێکی ئۆپۆزیسیۆنی سووریا لە عێراق مووچەی شەهیدانەی بۆ بڕاوەتەوە

ئاڤا نیوز

 

بڵاوبوونەوەی گرتەی ڤیدیۆیی هاووڵاتییەکی عێراقی کە لە نێو ڕیزەکانی ئۆپۆزیسیۆنی سووریا دەردەکەوێت، لە عێراقدا هەرا دەنێتەوە و دەستەی خانەنشینی عێراقیش لیژنەیەکی لێکۆڵینەوە لەسەر ئەو بابەتە پێکدەهێنێت.

 

چیرۆکی سەرەکی: نەزهان لهێبی ناسراوە بە ئەبو مەحموود، هاووڵاتییەکی کەرکووکە ماوەی 10 ساڵە وەک "شەهیدی شوێنبزر" تۆمارکراوە و مووچە بۆ کەسوکارەکەی بڕاوەتەوە. ئێستا دەرکەوتووە کە ئەو کەسە زیندووە، لە یەکێک لە گرتە ڤیدیۆکان لەگەڵ چەکدارانی ئۆپۆزیسیۆنی سووریا دەردەکەوێت.

 

بینراو و بیستراو: لەم ڕۆژانە گرتەیەکی ڤیدیۆیی ئەو کەسە بەناوی نەزھان لھێبی بڵاوکرایەوە کە خاوەن چێشتخانەی "لەیالی بەغدا"یە لە شاری ئیدلبی سووریا، هاوکات لەکاتی هێرشی گرووپەچەکدارییەکان بۆ سەر شارەکانی سووریا، وەکو یەکێک لە چەکدارەکانی ئەو گرووپانە لە شاری سەراقیبی سووریا دەردەکەوێت و دەڵێت ئینشەڵڵا دۆڵمەی عێراقی دەهێنمە سەراقیب و حەلەب و حەما.

 

ئەوەی لەبارەیەوە دەگوترێت: ڕاکان جبووری، پارێزگاری پێشووی کەرکووک لە چەندین بۆنەدا ئەوەی ڕاگەیاندبوو گوایە کورد ئەو هاووڵاتییەی بێسەروشوێن کردووە و لەزیندانەکانی هەولێر و سلێمانییە، کەچی لە سووریا لەگەڵ هێزەکانی ئۆپۆزیسیۆنی سووریا دەرکەوت.

 

کاریگەریی و لێکەوتەکان: دوای بڵاوبوونەوەی ئەو گرتە ڤیدیۆییە، دەردەکەوێت کە ئەو هاووڵاتییە عێراقییە ماوەی 10 ساڵە وەک "شەهیدی شوێنبزر" تۆمارکراوە  و مووچە بۆ کەسوکارەکەی بڕاوەتەوە. دەستەی خانەنشینی عێراق لە دەرکەوتنەوەی ئەو هاووڵاتییە عێراقییەی کۆڵیوەتەوە و بریاریداوە سەرجەم مووچەکان لە خانەوادەکەی وەربگرێتەوە و لێپێچینەوەش لەگەڵ فەرمانگە شەهیدانی کەرکووک بکرێت.