وەزارەتی دارایی عێراق: بەئەنقەست مووچەی فەرمانبەرانی کوردستانمان دوانەخستووە

ئاڤا نیوز

 

وەزارەتی دارایی عێراق ڕەتی دەکاتەوە بەئەنقەست مووچەی چوار مانگی هەرێمی کوردستانی خەرج نەکردبێت.

وێنە گەورەکە: هەندێک لە میدیاکان بڵاویانکردووەتەوە، وەزارەتی دارایی عێراق مووچەی چوار مانگی فەرمانبەرانی هەرێمی کوردستان بە ئەنقەست خەرج نەکردووە، وەزارەتەکەش ڕەتی دەکاتەوە.
 

ڕاگەیێنراوی فەرمی: بەشی ڕاگەیاندن و پەیوەندییەکان لە وەزارەتی دارایی عێراق لە ڕاگەیێنراوێکدا ئاماژەی بە سێ خاڵ کردووە:

 

یەکەم: وەزارەتی دارایی مووچەی فەرمانبەرانی هەرێمی کوردستانی بۆ مانگەکانی 11 و 12ی ئەمساڵ دابین کردووە و پارەی پێویست بۆ لایەنە پەیوەندیدارەکانی هەرێمی کوردستان گواستراوەتەوە".

دووەم: لە ڕاگەیێنراوەکەدا ئاماژە  بەوەش کراوە، "ئەوان پابەندن بە بڕیاری دادگەی فیدراڵی سەبارەت بە خەرجکردنی مووچەی فەرمانبەرانی هەرێمی کوردستان، بەڵام هەرێمی کوردستان پابەند نەبووە بەو میکانیزمەی کە وەزارەتی دارایی فیدراڵی لە بواری داراییدا پەسەندی کردووە، بابەتی وردبینی لە لیستی فەرمانبەران بووەتە هۆی دواکەوتنی خەرجکردنی مووچە لە کاتی خۆیدا".

سێیەم: وەزارەتی دارایی عێراق دووپاتی دەکاتەوە، گفتوگۆکانیان لەگەڵ دەسەڵاتدارانی هەرێمی کوردستان سەبارەت بە مووچەی فەرمانبەران لەڕێگەی کۆبوونەوەی خولیی نێوان وەزارەتی دارایی فیدراڵ و وەزارەتی دارایی و ئابووری هەرێم بەردەوام دەبێت، هەردوولاش پابەند دەبن بە دابینکردنی مووچەی فەرمانبەران لەکاتی خۆیدا .