ئەحمەد شەرع: سووریای داهاتوو نابێتە ئەفغانستان

ئاڤا نیوز

 

فەرماندەی ئۆپەراسیۆنە سەربازییەکان لە سووریا داوای هەڵوەشاندنەوەی سزا ئابورییەکان دەکات کە پێشتر بەسەر سووریادا سەپێنرا بوو. هاوکات دەڵێت، سووریای داهاتوو نابێتە ئەفغانستان و هاووڵاتییانمان جیاواز بیردەکەنەوە.

 

وێنە گەورەکە: لە میانی چاوپێکەوتنێکی ئەحمەد شەرع، فەرماندەی ئۆپەراسیۆنە سەربازییەکان لە سووریا بۆ کەناڵی بی بی سی دوپاتیکردەوە کە سووریا بڕیار نییە ببێتە ئەفغانستان و جیاوازی ئەو دوو وڵاتە زۆرە.

 

ئەحمەد شەرع لە وەڵامی پرسیارەکاندا ڕایگەیاند:

- دەبێت هاوڵاتییانی سووریا بۆ چارەسەری تەواوی کێشەکان ئارامگربن و پەلە نەکەن.

- لەگەڵ هەموو چین و توێژەکانی سووریا گفتوگۆ دەکەین بۆ ئەوەی دڵنیا بین کە نوێنەری هەموویانمان هەیە.

-لەگەڵ هەموو چین و توێژێک پێکدێین و ئاشت دەبینەوە، چونکە ئێمە شۆڕشمان کرد و شۆڕش هەموو خەڵکی سووریا لەخۆدەگرێت.

- جیاوازی نێوان ئێمە و تاڵیبان زۆرە، سووریا لەگەڵ ئەفغانستان کە وڵاتێکی خێڵەکییە جیاوازی زۆرە هاوڵاتییانی سووریا جیاواز بیر دەکەنەوە و نابینە ئەفغانستانێکی دیکە.

- کاتێک باس لە مافی ئافرەت دەکرێت، دەبێت بزانن کە زیاتر لە 60%ی خوێندکاران لە زانکۆ لە گەڵماندا ئافرەت بوون، بۆ بابەتی مەشروب خواردنی ئافرەتان دەبێت لیژنەی یاسایی بڕیار بدات و یاسا سەروەری هەموومانە.

- دەبێت سزا ئابورییەکان هەڵبوەشێنرێتەوە، چونکە سزا ئابورییەکان بۆ ڕژێمی پێشوو بوو نەک سووریای نوێ، نابێت لەگەڵ ستەمکار و ستەملێکراو یەک جۆر ڕەفتار بکرێت.

 

باکگراوند: دەستەی تەحریرولشام لە ساڵی 2015 لە گرووپی ئەحرارولشام جیابووەوە، بەشدارییان لە شەڕی ناوخۆی سووریا کردووە و ئێستا دوای ڕووخانی دەسەڵاتی بەشار ئەسەد، ئەحمەد شەرع، سەرۆکی دەستەکە سەرکردایەتیی سووریا دەکات، هەرچەندە ئەوروپا و بەشێکی زۆری وڵاتان پەیوەندییان بە دەستەکە هەیە، بەڵام تاوەکو ئێستا لە لیستی تیرۆرە.