"نەخشەی گۆڕانکاری لە ڕۆژهەڵاتی ناوەڕاست کێشراوە" و هۆشداریش بەعێراق دەدرێت

ئاڤا نیوز

 

شڕۆڤەکارانی سیاسی و شارەزایانی پەیوەندییە نێودەوڵەتییەکان هۆشداری لە مەترسی ڕێگریکردنی عێراق دەدەن، بۆ ئەو گۆڕانکارییانەی  لە ناوچەی ڕۆژهەڵاتی ناوەڕاستدا نەخشەی بۆ کێشراوە.

 

وێنە گەورەکە: بەگوێرەی ڕاپۆرتە نێودەوڵەتییەکان، پێشهاتەكانی ئەم دواییەی سووریا تەنیا لەو وڵاتەدا ناوەستێت و ڕووداوەكان بەشێوەیەكی خێرا دەگوزەرێن، لەپشتی ئەو گۆڕانكارییە خێرایانەوە پلانێك بۆ گوڕانکاری ڕیشەیی لە رۆژهەڵاتی ناوەڕاستدا هەیە.

 

لێدوانی فەرمی: مستەفا تائی، شارەزا لە کاروباری پەیوەندییە نێودەوڵەتییەکان بە ئاڤای گوت: دوای ڕووداوەکانی غەززە و لوبنان و پاشان سووریا، ئێستا ئاراستەی ململانێکان بەرەو عێراق و تەنانەت ئێرانیش دەڕوات و نابێت عێراق دژی ئیرادەی گۆڕانکاری لەناوچەکەدا بوەستێت و ببێتە بەشێک لەو قەیرانەی بەرۆکی گرتووە.

 

زانیاریی زیاتر: نەخشەی گۆڕانکاری لە ناوچەی ڕۆژهەڵاتی ناوەڕاست بە تەواوی پەیوەستە بە نەهێشتنی هەیمەنەی ئێران و ڕاماڵینی چەک لەو هێزانەی لەژێر هەژمونی تاران کاردەکەن، هاوکات بە فەرمی داوا لە عێراق کراوە ئەو کارە بکات و شکستی حکومەتیش لەم دۆسیەیەدا ناسەقامگیری وڵاتەکەی لێدەکەوێتەوە.