زاخۆ ئامادەکاریی بۆ هاتنی 150 هەزار گەشتیار دەکات

ئاڤا نیوز

 

بۆ سێیەم ساڵ ئیدارەی سەربەخۆی زاخۆ پێشوازیی لە فێستیڤاڵێکی 10 ڕۆژە دەکات و ئامادەکاریی تەواویشی بۆ کراوە بۆ هاتنی ژمارەیەکی زۆر لە گەشتیاران.

 

وێنە گەورەکە: بەمەبەستی بایەخدان بە کەرتی گەشتیاریی لە ئیدارەی سەربەخۆی زاخۆ، لە 10 ڕۆژی کۆتایی ساڵدا فێستیڤاڵیک تایبەت ڕێکدەخرێت و تیایدا چەندین چالاکی جۆراوجۆی پیشکەش دەکرێت و دەرفەتی کاریش بۆ ژمارەیەک لە هاووڵاتییان دەڕەخسێنرێت. 

 

لێدوانی فەرمی: بێوار سندی، بەڕێوەبەری ڕاگەیاندن و بەبازاڕکردن لە بەڕێوەبەرایەتیی گشتیی گەشتوگوزار لە ئیدارەی سەربەخۆی زاخۆ بە ئاڤا نیوزی ڕاگەیاند: ئاهەنگی تایبەت پێشکەش دەکرێت و هونەرمەندانی هەر چوار پارچەی کوردستان بانگهێشت کراون، هاوکات ئامادەکاریی تەواومان کردووە و پێشبینی دەکەین نزیکەی 150 هەزار گەشتیار ڕوو لە زاخۆ بکەن. 

 

ئەوەی پێویستە بیزانیت: فێستیڤاڵەکە لە کۆڕنیشی زاخۆ و نزیک لە پردی دەلال ڕێک دەخرێت، چەندین کەپری تایبەت ئامادە دەکرێن و خواردن و خواردنەوە پێشکەش بە گەشتیاران دەکەن کە لە ڕێگەیەوە هەلی کار بۆ چەندین کەس دەڕەخسێنرێت. 
 

باکگراوند: لە دوو ساڵی ڕابردوودا نزیکەی لە 100 هەزار گەشتیاریی ناوخۆی و بیانی ڕوویان لە فێستیڤاڵی زاخۆ کردووە و چاوەڕوانیش دەکرێت ئەمساڵ ڕێژەکە بەرز ببێتەوە.