لە سووریا لە چەند ناوچەیەک شەڕ و پێکدادان دروست بوو

ئاڤا نیوز

 

ئەمڕۆ لە چەند ناوچەیەكی سووریا پشێوی و ئاڵۆزی دروستبووە، لە تەڕتووس پێكدادان لەنێوان هێزە ئەمنییەكانی ئیدارەی نوێی  سووریا و پاشماوەكانی سوپای ئەسەد ڕوویدا و كوژراو و بریندار هەیە.

 

ڕاگەیێنراوی فەرمی: وەزارەتی ناوخۆی ئیدارەی نوێی سووریا ڕاگەیێنراوێكی بڵاوكردووەتەوە و تێیدا هاتووە، كەمێك پێش ئێستا لە تەڕتووس تێكهەڵچوون لەنێوان هێزەكانی وەزارەتی ناوخۆ و ژمارەیەك چەكدار كە پاشماوەی سەربازانی سوپای بەشار ئەسەدن، ڕوویداوە و بەهۆیەوە دوو ئەندامی هێزە ئەمنییەكان كوژراون و چواریش برینداربوون، چەكدارەكانیشیان لە ناوچەیەكی تەڕتووس گەمارۆداوە.

 

لەلایەكی دیكەوە: ئۆپەراسیۆنە سەربازییەكانی سووریا ئەم ڕووداوەی پشتڕاستكردەوە و ڕایگەیاندووە، "كۆمەڵێك لە یاسا دەرچوومان لە قرداخە لەناوبرد".

 

وەزارەتی ناوخۆی ئیدارەی نوێی سووریا ئەوەشی باسكردووە، پاشماوەی سەربازانی سوپای ئەسەد بۆ ئاژاوەنانەوە مەزارگەیەكیان لە حەلەب سووتاندووە.

 

زانیاریی زیاتر: بەهۆی دروستبوونی شەڕ و ئاڵۆزی ئەمڕۆی سووریا، ئیدارەی نوێی سووریا، قەدەغەی هاتووچۆی لە حمس و لازقییە ڕاگەیاند.