بە تۆمەتی ڕاوکردنی دوو کاری کێوی چوار کەس دەستگیر دەکرێن

ئاڤا نیوز

 

چوار هاونیشتمانی لە زنجیرە چیای ئاسۆس دوای ڕاوکردنی دوو کاری کێوی لەلایەن مەفرەزەکانی ئاسایشی سلێمانی دەستگیر دەکرێن. 

 

ڕاگەیێنراوی فەرمی: بەڕێوەبەرایەتیی پۆلیسی دارستان و ژینگەی پارێزگای  سلێمانی ڕایگەیاند: دوای ئەوەی چوار هاووڵاتی هەڵدەستن بە ڕاوکردنی  دوو کاری کێوی لە زنجیرە چیای ئاسۆس، پاشان لە نزیک گوندی گەڵاڵەی سەر بە قەزای ماوەت لەلایەن مەفرەزەکانی ئاسایش دەستگیردەکرێن.

 

بەگوێرەی بەڕێوەبەرایەتیی پۆلیسی دارستان و ژینگەی سلێمانی دوای دەستگیرکردنی تۆمەتباران، دەست دەگیرێت بەسەر چەند کەل و پەلێکدا وەک، یەک چەکی جۆری تاپڕ، شەش فیشەکی تاپڕ، 42 فیشەکی قەناس، یەک دووربین و دوو کیسە خەو.

 

ئەوەی پێویستە بیزابیت: پەڕاوی لێکۆڵینەوە لەلایەن بەشی پۆلیسی دارستانی ماوەت بۆ دۆسیەکە ڕێکخراوە، بەپێی بڕیاری دادوەر لە ئێستادا تۆمەتبارەکان بەندکراون تا ڕێکاری یاساییان لە دژ دەگیرێتەبەر.

 

ئەمەش بزانە: لە هەرێمی کوردستان ڕاوکردنی ئاژەڵی کێوی قەدەغەیە و هەرکەسێک ئەم کارە بکات لەلایەن پۆلیسی دارستان و هێزە ئەمنیەکان دەستگیر دەکرێت و سزا دەدرێت.