لە هەرێمی کوردستان ژمارەیەک حەب و دەرمان دەخرێنە لیستی ماددە هۆشبەرەکان

ئاڤا نیوز

 

وەزارەتی تەندروستی بە هەماهەنگی لەگەڵ بەڕێوەبەرایەتییە گشتییەكانی بەرەنگاربوونەوەی ماددە هۆشبەرەکان لە پارێزگاكانی هەرێمی كوردستان، ژمارەیەك حەب و دەرمان دەخاتە لیستی ماددە هۆشبەرەكان و كارتێكەرە عەقڵییەكان، كە پێشتر وەك چارەسەری پزیشكیی ئاسایی بەكاردەهێنران. 

 

لێدوانی فەرمی: د. سەركار سوورچی، وتەبێژی وەزارەتی تەندروستیی هەرێمی كوردستان تایبەت بە ئاڤا میدیای ڕاگەیاند: لەبەر بەرژەوەندی گشتیی و پاڵپشت بە كۆنووسی لیژنەی باڵای ماددە هۆشبەرەكان كە خودی وەزیری تەندروستی سەرپەرشتی لیژنەكە دەكات، ژمارەیەك حەب و دەرزی خراونەتە پۆلێنی ماددە هۆشبەرەكان.

ئەوەی پێویستە بیزانیت: لەمەبەدوا تەنیا لەڕێگەی پزیشكی پسپۆڕی نەخۆشییە دیاریكراوەكان یاخود لیژنەی پزیشكی تایبەتمەند، بۆ حاڵەتی زۆر تایبەت بەكاردەهێنرێن و مامەڵەپێكردنیان بەشێوەیەكی ئاسایی قەدەغە كراوە و لە دەرمانخانەكانیش ڕێگە بەفرۆشتنیان نادرێت.

 

حەب و دەرمانەکان چین: ئەوانەی قەدەغەکراون بریتین لە حەبی جۆری ئیلپازۆلام، ئەلەرمین، دیازپام، ئێكس، دەرزی هۆشبەری ئێكس، حەبی مۆبیك.

 

بۆچی گرنگە: ڕۆژ لەدوای ڕۆژ ژمارەی بەکارهێنەرانی ماددە هۆشبەرەکان لە هەرێمی کوردستان لە زیادبووندایە، بەشێک لەوان کاتێک ماددەی هۆشبەریان دەستناکەوێت پەنا بۆ ئەو حەب و دەرمانانە دەبەن کە ماددەی سڕکەریان تێدایە.

 

لەلایەکی دیکەوە: وەک وتەبێژی وەزارەتی تەندروستی بۆ ئاڤای باس کرد، ڕەزامەندیی سەرەتایی سەرۆكایەتیی ئەنجوومەنی وەزیران وەرگیراوە لەسەر كردنەوەی سێ سەنتەری شیاندنەوەی جەستەیی و دەروونی بۆ ئاڵوودەبووانی ماددەی هۆشبەر.