ئاڤا بەدواداچوون بۆ دابەشکردنی زەویی پاسەوانانی سنوور دەکات

ئاڤا نیوز

 

دوای سەردانەکەی سەرۆکوەزیرانی، عێراق محەممەد شیاع سوودانی بۆ فەرماندەی پاسەوانی سنوور، بڕیاردرا زەوی بەسەر پاسەوانانی سنوور لە شوێنی نیشتەجێبوونیان دابەشبکرێت، بەڵام ئەو پۆلیس و پاسەوانانەی خەڵکی هەرێمی کوردستانن کە ژمارەیان هەزاران پۆلیس و پاسەوان دەبێت، بڕیارە لە جیاتی زەوی، بڕی 27 ملیۆن دیناریان پێ بدرێت.

 

وێنە گەورەکە: لە دوای بڵاوبوونەوەی پێدانی پارە لە جیاتی زەوی، دەنگۆی ئەوە بڵاوکرایەوە کە کۆبوونەوە لەنێوان ئەفسەرانی پۆلیسی سنوور کراوە و لەگەڵ حکومەتی هەرێمی کوردستان ڕێککەوتوون، ئەو پارەیەی کە لە بری زەوی بۆ ئەو پۆلیسانەی هەرێمی کوردستان دابینکراوە، بخرێتە سەر هەژماری حکومەتی هەرێمی کوردستان و وەزارەتی شارەوانی لە جیاتی پارەکە زەوییان بۆ تەرخان بکات.

 

لێدوانی فەرمی: یەکێک لە پۆلیسەکانی سنوور کە نەیویست ناوی ئاشکرا بکرێت، بە ئەڤا میدیای ڕاگەیاند: دەنگۆی پێدانی زەویی لە جیاتی ئەو پارەیەی کە حکومەتی عێراق دابینی کردووە، لەناو سەرجەم پاسەوانانی سنوور و پۆلیسەکان بڵاوبووەتەوە، "ئێمە ناڕازین و قبوڵ ناکەین، چونکە ئەو زەوییەی وەزارەتی شارەوانی لە ناوچەکانی نیشتەجێبوونمان بۆمان تەرخان دەکات، پارەیەکی زۆر کەم دەکات، ئەمەش ناکاتە نیوەی ئەو پارەی حکومەتی عێراق دابینی کردووە".

 

لەلایەکی دیکەوە: ئاڤا میدیا بەدواداچوونی لەگەڵ وەزارەتی شارەوانی و گەشتوگوزاری حکومەتی هەرێمی کوردستان کرد، لەوبارەیەوە سەربەست مەولوود، بەڕێوەبەری بەشی یاسایی لە وەزارەتی شارەوانی حکومەتی هەرێمی کوردستان ڕاگەیاند: دابەشکردنی زەوی، پۆلیس و پاسەوانانی سنوور لە هەرێمی کوردستان ناگرێتەوە، چونکە فەرمانبەری حکومەتی هەرێمی کوردسان نین. هاوکات دەنگۆی پێدانی زەوی لەلایەن وەزارەتی شارەوانی و گەشتوگوزاری حکومەتی هەرێمی کوردستان لە بەرامبەر ئەو پارەیەی کە حکومەتی عێراق بۆ پۆلیس و پاسەوانانی سنوور دابینی کردووە، ڕاست نین و "هیچ شتێک لەسەر ئەم بابەتە بۆ ئێمە نەهاتووە و ئاگادار نین".