ئەحمەد شەرع داوا لە ئێران دەکات ڕێز لە سەروەریی سووریا بگرێت

ئاڤا نیوز

 

ئەحمەد شەرع، بەرپرسی ئیدارەی نوێی سووریا، داوا لە ئێران دەکات ڕێز لە سەروەریی سووریا بگرێت و گوتیشی پێویستە ئێران بە سیاسەتەکانی خۆیدا بچێتەوە.

 

وێنە گەورەکە: لەدوای گرتنە دەستی دەسەڵات و کۆتایی هێنان بە دەسەڵاتەکەی بەشار ئەسەد، ئەحمەد شەرع بەردەوامە لە ناردنی پەیام بۆ وڵاتانی ناوچەکە و جیهان بە ئامانجی دووبارە بوونیاد نانەوەی پەیکەری ئیداری وڵاتەکەی. 

 

لێدوانی فەرمی: شەرع لە چاوپێکەوتنێکی میدیاییدا گوتی "لە هەر وڵاتێک کە ئێران ڕۆڵی تێدا هەیە، وەک عێراق، لوبنان و سووریا، پێکدادانە تائیفییەکان تیایدا زۆر فراوانە بە جۆرێک کە دەبێتە هۆی کەوتنەوەی شەڕی ناوخۆ، گەندەڵیی ئیدرایی بەرچاو لە ئاستی دەوڵەت و دامەزراوە گشتییەکان و هەروەها بەرهەمهێنان و پیشەسازیی کەپتاگۆن و ماددەی دیکەی هۆشبەر تیایدا فراوان دەبێت."

 

شەرع ڕاشیگەیاند سووریا ناتوانێت لەگەڵ وڵاتێکی گەورەی ناوچەکە وەک ئێران پەیوەندیی بپچڕێنێت، بەڵام دەبێت پەیوەندییەکانی نێوان دیمەشق و تاران لە سەر بنەمای دیبلۆماسی، ڕێزگرتنی دوولایەنە لە سەروەریی یەکدی و دەستتێوەرنەدان لە کاروباری ناوخۆیی وڵاتان بێت.

 

لەلایەکی دیکەوە: دوێنی عەباس عێراقچی، وەزیری دەرەوەی ئێران لە کۆنگرەیەکی ڕۆژنامەوانیدا جەخت لە ئاشتی و سەقامگیری سووریا کردەوە و ڕایگەیاند: جەخت لە پێکهێنانی حکومەتی نوێی سووریا بە ئاشتی و سەقامگیری لە ناوچەکە دەکەینەوە. لەگەڵ ئەوەشدا پێویستە دەستێوەردانی دەرەکی لە کاروباری سووریا نەبێت.