مالیکی هۆشداری دەدات: ئەگەری گۆڕانکاری لە نەخشەی عێراق هەیە

ئاڤا نیوز

 

سەرۆکی هاوپەیمانیی دەوڵەتی یاسا ئاماژە بە پلانی "زلهێزان" دەکات بۆ دەستکاریکردنی نەخشەی سیاسیی  وڵاتانی دوروبەری ئیسرائیل. هاوکات ئاماژە بە دەستکاریکردنی نەخشەی عێراقیش دەکات و دەڵێت دووبارە دادەڕێژرێتەوە.

 

وێنە گەورەکە: دوای لاوازکردنی بزووتنەوەی حەماس لە غەززە و حیزبووڵڵای لوبنان لەلایەن ئیسرائیل و ڕووخانی حکومەتی بەشار ئەسەد لە سووریا لەلایەن گرووپە چەکدارەکانەوە، ئێستا ئیسرائیل دەستی بە هێرش و لاوازکردنی حووسییەکانی یەمەن کردووە، کە سەرجەمیان نزیک لە ئێران بوون، بۆیە پێشبینی دەکرێت لە قۆناغی داهاتوودا سەرەی عێراقیش بێت و ئیسرائیل هێرش بکاتە سەر حەشدی شەعبی، ئەمە لەکاتێکدایە پێشتر بە ئاشکرا و نهێنی چەندین جار ئەو هەڕەشەیەی کردووە.

 

لێدوانی فەرمی: نووری مالیکی، سەرۆکی هاوپەیمانیی دەوڵەتی یاسا ڕایگەیاند:

- ئێستا ئەرکمان ئاڵۆز بووە، پێشتر دەمانویست پارێزگاری لە غەززە و باشووری لوبنان بکەین، بەڵام ئەمڕۆ بەهۆی گۆڕانکاری لە سووریا ئەرکمان بووەتە پارێزگاریکردن لە ناوچەکە کە زیاتر کەوتووەتە بەر پێشێلکاری و دەستدرێژی و ئەگەری دووبارە کێشانەوەی نەخشەی عێراق.

- پرۆژەی دابەشکردن و بچووککردنەوەی ئەو وڵاتانەی کەوتوونەتە دەوروبەری ئیسرائیل لە ساڵانی 1967 بۆ 1982 نووسراوە، ئەوەش لەپێناو ئەوەی ئەو وڵاتانە نەتوانن ڕووبەڕووی ئیسرائیل ببنەوە و نەشتوانن هاوپەیمانییەک بۆ ڕووبەڕووبوونەوەی پێکبهێنن.

 

لەلایەکی دیکەوە:  محەممەد شیاع سوودانی، سەرۆکوەزیرانی عێراق ڕایگەیاندبوو، چەند کەس و لایەنێک دەیانەوێت ئەو گۆڕانکارییانەی لە سیستەمی حوکمی سووریا ڕوویاندا بە عێراقی ببەستنەوە، "ئەمەش دوورە لە تێگەیشتنی سیاسی و ڕەتی کردەوە هیچ گۆڕانکاریەک لە سیستەمی سیاسی عێراق ڕووبدات".