بلینکن و هاوتا میسریەکەی تاوتوێی بارودۆخی غەززە و سووریا دەکەن

ئاڤا نیوز

وەزارەتی دەرەوەی ئەمریکا ڕایگەیاند، ئەنتۆنی بلینکن لەگەڵ هاوتا میسرییەکەی بەدر عەبدولعەتی، دۆخی ئێستای غەززە و پێشهاتەکانی سووریایان تاوتوێ کردووە.  

 

ڕاگەیێنراوی فەرمی: وەزارەتی دەرەوەی ئەمریکا لە بەیاننامەیەکدا ڕایدەگەیێنێت، ئەنتۆنی بلینکن، وەزیری دەرەوەی ئەمریکا لە پەیوەندییەکی تەلەفۆنیدا لەگەڵ بەدر عەبدولعەتی، وەزیری دەرەوەی میسر باسیان لە دۆخی سووریا کردووە، هاوکات جەخت لە پشتگیریی ئەمریکا کراوەتەوە بۆ پاڵپشتیکردن لە حکومەتی نوێی سووریا.

 

لەلایەکی دیکەوە: سەبارەت بە دۆخی غەززە ڕۆژنامه‌ی نیویۆرك تایمز بڵاویکردۆتەوە، بلینكن ئاماژەی بەوەکردووە، ڕێككه‌وتن له‌سه‌ر ئاگربه‌ست و ئازادكردنی بارمته‌ ئیسرائیلییەکان، یەکێکن لەو دوو ڕێگا خێرایانەی کە کاریگەرن بۆ کۆتاییهێنان بە شەڕی غەززە. 

 

ئەوەی لەبارەیەوە دەگوترێت: ئه‌گه‌ر له‌ماوەی دوو هه‌فته‌ی داهاتوودا ئاگربه‌ستی غەززە و ئازادكردنی بارمته‌كان بە هیچ ئەنجامێک نەگات، دۆسییەکە ڕاده‌ستی ئیدارەی نوێی ئەمریکا دەکرێت لە كۆشكی سپی کە دۆناڵد ترەمپ سەرکردایەتیی دەکات.