لە سلێمانی دەست بە داخستنی نووسینگە و بارەگاکانی نزیک لە پەکەکە دەکرێت

ئاڤا نیوز

 

ماڵپەڕی ئەلحوڕەی ئەمریکی لە ڕاپۆرتێکدا بڵاویکردوەتەوە، ئاسایشی سلێمانی چوار نووسینگە و ناوەندی نزیک لە پارتی کرێکارانی کوردستان (پەکەکە)ی داخستووە، ئەوانیش پێکدێن لە بزووتنەوەی ژنانی ئازاد، کۆمپانیای نۆگار و مارزیا و گزنک کە کاری میدیایی دەکەن.

 

لێدوانی فەرمی: لەم بارەیەوە سەلام عەبدولخاڵق، بەڕێوەبەری ڕاگەیاندنی ئاسایشی سلێمانی بە ماڵپەرەکەی گوتووە، "داخستنی ئەو شوێنانە لەژێر ڕۆشنایی فەرمانی دادوەری بەغداوە  بووە کە پێش چەند مانگێک دەرکراوە".

 

زانیاریی بەدەستهاتوو: ئاڤا زانیویەتی بە فەرمانی بافڵ تاڵەبانی و قوباد تاڵەبانی، سەرجەم بارەگا و ناوەند و نووسینگەی دارایی و کۆمەڵایەتی و ڕاگەیاندنی سەر بە پەکەکە لە سلێمانی دادەخرێن.

 

ئەوەی پێویستە بیزانیت: فەرمانەکەی سەرۆکی یەکێتی بۆ دەزگا ئەمنییەکان بووە و ئەوانیش زیاتر لە 12 شوێن دادەخەن و پێشیان ڕاگەیاندوون کە دەبێت سلێمانی جێبهێڵن، بەپێچەوانەوە ئەگەر وانەکەن دەستگیر دەکرێن.