گەنجینەی ئەمریکا بەشێک لە سزاکانی سەر سووریا هەڵدەگرێت

ئاڤا نیوز

 

وەزارەتی گەنجینەی ئەمریکا سزاکانی بۆ ماوەی 6 مانگ لەسەر سووریا لادەبات، بۆ ئەوەی حکومەتی نوێی ئەو وڵاتە بتوانێت خزمەتی هاووڵاتیانی بکات.

 

ڕاگەیێنراوی فەرمی: وەزارەتی گەنجینەی ئەمریکا ڕایگەیاند: 

- فەرمانگەی کۆنترۆڵکردنی سەروەت و سامانی دەرەکی وەزارەتەکەیان مۆڵەتی گشتی بۆ سووریا دەرکرد کە بتوانێت مامەڵەی دەرەکی بۆ بوژانەوەی وڵاتەکە بکرێت و مۆڵەتەکەش بۆ ماوەی 6 مانگە و حکومەتی ئەمریکا بەردەوام چاودێری دۆخی سووریا دەکات.

- ئەمریکا جەخت لە پابەندبوونی لەسەر ئەوە دەکاتەوە کە سزاکانی نابنە ڕێگر لە دابینکردنی پێداویستییە سەرەتاییەکان بۆ سوورییەکان و هاوکارییە مرۆییەکان.

 

لێدوانی فەرمی: والی ئادێیمۆ، جێگری وەزیری گەنجینەی ئەمریکا ڕایگەیاند:

- کۆتایی هاتنی دەسەڵاتی دڕندانە و سەرکوتکارانەی بەشار ئەسەد بە پشتیوانی ڕووسیا و ئێران، دەرفەتێکی ناوازە بۆ سووریا و گەلەکەی دەڕەخسێنێت، بۆ ئەوەی وڵاتەکەیان ئاوەدان بکەنەوە.

- لەم قۆناغەدا گەنجینەی ئەمریکا بەردەوام دەبێت لە پاڵپشتیکردنی هاوکارییە مرۆییەکان و حکومەتی بەرپرسیارانە لە سووریا.

 

ئەوەی پێویستە بیزانیت: وەزارەتی گەنجینەی ئەمریکا، بۆ ئەوەی هاوکار بێت لەوەی سزاکانی ئەمریکا ڕێگری لە خزمەتگوزارییە گرنگەکان بۆ سوورییەکان ناکەن ئەم بڕیارەی داوە، ئەم مۆڵەتە هیچ موڵک و ماڵێکی بلۆککراوی بەشار ئەسەد و هاوکارەکانی، حکومەتی سووریا و بانکی ناوەندیی سووریا، هەیئەت تەحریرولشام ناگرێتەوە. 

 

باکگراوەند: لە ئەنجامی سیاسەتی ڕژێمی بەشار ئەسەد لە دژی گەلی سووریا و پشتیوانی لە تیرۆر و کردەوەی ناسەقامگیری لە سەرانسەری ناوچەکەدا، سووریا یەکێک بوو لەو وڵاتانەی بە شێوەیەکی هەمەلایەنە لەلایەن ئەمریکاوە سزای بەسەردا سەپێنرابوو.