گەشتە نێودەوڵەتییەکانی فڕۆکەخانەی دیمەشق دەستیان پێکردەوە

ئاڤا نیوز

 

دوای وەستانی گەشتە ئاسمانییەکان بۆ ماوەی مانگێک، ئەمڕۆ جارێکی دیکە فڕۆکەخانەی نێودەوڵەتیی دیمەشق کرایەوە و گەشتە ئاسمانییەکانی دەستپێکردەوە، یەکەم گەشتیش بەرەو فڕۆکەخانەی شاریقە دەبێت لە ئیمارات.

 

زانیاری بەدەستهاتوو: بژار شەریف، نێردراوی گرووپی میدیای ئاڤا لە دیمەشق ڕایگەیاند: ئەمڕۆ فڕۆکەخانەی نێودەوڵەتیی دیمەشق کرایەوە و یەکەم گەشتیش بەرەو فرۆکەخانەی شاریقە بوو لە ئیمارات، گوتیشی فڕۆکەکە 180 سەرنشینی تێدابووە.

ئەوەی پێویستە بیزانیت: فڕۆکەخانەی دیمەشق لە 8-12-2024 دوای ڕووخانی دەسەڵاتی بەشار ئەسەد و تێکچوونی دۆخی وڵات، بۆ ماوەیەکی کاتی گەشتەکانی ڕاگرت. لە 18-12-2024 یەکەم گەشتی ئاسمانی ناوخۆیی لە ڕێگەی فڕۆکەیەکی سەر بە کۆمپانیای فڕۆکەوانی سووریا لە دیمەشقەوە بەرەو حەلەب کرا و بەم گەشتەی ئەمڕۆش، گەشتە نێودەوڵەتییەکانی دەستپێدەکاتەوە.

 

لەلایەکی دیکەوە: بڕیارە بەمزووانە ڕەجەب تەیب ئەردۆغان، سەرۆککۆماری تورکیا سەردانی دیمەشق بکات، گوتاربێژی مزگەوتی ئەمەوی داوادەکات ئەردۆغان بچێتە مزگەوتەکە و لەوێ نوێژ بکات، کردنەوەی فرۆکەخانەکەش هاوکاتە لەگەڵ نزیکبوونەوەی سەردانەکەی ئەردۆغان بۆ سووریا.

 

باکگراوند: فڕۆکەخانەی دیمەشقی نێودەوڵەتی، گەورەترین فڕۆکەخانەی سووریایە، 25 کیلۆمەتر لە دیمەشقەوە دوورە و  لە ساڵی 1970 بوونیادنراوە.