داهاتی ناوخۆی هەرێمی کوردستان چەند بووە و چۆن خەرجکراوە؟

ئاڤا نیوز

 

لە کاتێکدا حکومەتی فیدراڵ نزیکەی یەک ملیار دیناری بۆ مووچەی مووچەخۆرانی هەرێمی کوردستان خەرجنەکردووە، داهاتی ناوخۆ لەلایەن حکومەتی هەرێمی کوردستانەوە بۆ کورتهێنانی مووچە بەکارهێنراوە.

 

وێنە گەورەکە: بەپێی خشتەکانی تەرخانکراوی هەرێمی کوردستان لە بودجەی فیدراڵ کە بڕی 11 تریلیۆن و 576 ملیار دینارە، تەنیا بڕی 10 تریلیۆن و 752 ملیار دینار بە فیعلی خەرجکراوە، بۆیە حکومەتی هەرێمی لە داهاتی ناوخۆ کورتهێنانی مووچەی فەرمانبەرانی پڕکردووەتەوە.

 

ڕاگەیێنراوی فەرمی: حکومەتی هەرێمی کوردستان ڕایگەیاند: ئەوەی لە داهاتی ناوخۆ ماوەتەوە، بۆ خەرجیی بەکاربردن تایبەت بە خزمەتگوزارییە گشتییەکان و پرۆژەکانی وەبەرهێنان خەرجکراوە، بەو پێیەی وەزارەتی دارایی فیدراڵ، جگە لەو بڕە پارەیە هیچ شایستەیەکی دیکەی هەرێمی کوردستانی خەرج نەکردووە لە تەرخانکراوەکانی دیکەی هەرێمی کوردستان وەک بودجەی بەکاربردن و بودجەی پڕۆژەکانی وەبەرهێنان.

 

لەلایەکی دیکەوە: پێشه‌وا هه‌ورامانی، وته‌بێژی‌ حكومه‌تی هەرێمی کوردستان بە ئاڤا میدیا ڕاگەیاند: حكومەتی عێراق تەنیا 7%ی بودجەی بۆ هەرێمی كوردستان ناردووە، ساڵی ڕابردوو داهاتی ناوخۆ سێ ترلیۆن و 600 ملیار دینار بووە، نزیکەی 960 ملیار دینار بۆ کورتهێنانی مووچەی مووچەخۆران بەکارهێنراوە، ئەگەر بەغدا بەمشێوەیە بەردەوام بێت، کشانەوەی کورد لە بەغدا مەحاڵ و دوور نییە.

 

ئەوە پێویستە بیزانیت: لە دوایین قسەی وەزیری دارایی عێراق بۆ شاندی حکومەتی هەرێمی کوردستان ڕایگەیاندووە، کە مووچەی مانگی 12ـی فەرمانبەرانی هەرێمی کوردستان ڕەوانە دەکەن.