نەوەی نوێ و یەكگرتوو و كۆمەڵ لە كۆبوونەوەی ئەنجوومەنی وەزیران بەشدار نەبوون

ئاڤا نیوز

 

هیچ یەك لە فراكسیۆنی یەكگرتووی ئیسلامی، كۆمەڵی دادگەری و نەوەی نوێ بەشداریی كۆبوونەوەكەی ئەمڕۆی ئەنجوومەنی وەزیرانی هەرێمی كوردستانیان نەكرد كە لەگەڵ وەزیر و نوێنەری فراكسیۆنە كوردستانییەكانی عێراق ساز درابوو و گوتەبێژی حكومەتیش ئاشكرای دەكات سەرۆكوەزیران مەسرور بارزانی سەبارەت بە بەشداربووانی كۆبوونەوەكە چیی گوتووە.

 

چیرۆكی سەرەكی: بۆ گفتوگۆكردن سەبارەت بە پابەندنەبوونی حكومەتی عێراق بۆ دابینكردنی شایستە داراییەكانی هەرێمی كوردستان و خستنەڕووی پێشنیاری كشانەوەی كورد لە بەغدا، داوا لە سەرجەم وەزیر و فراكسیۆنە كوردستانییەكانی عێراق كرا ئەمڕۆ لە كۆبوونەوەیەكی نائاسایی ئەنجوومەنی وەزیران بە سەرپەرشتیی سەرۆكوەزیران مەسرور بارزانی ئامادە بن، بەڵام فراكسیۆنی یەكگرتوو، كۆمەڵ، نەوەی نوێ ڕەتیان كردەوە.

 

لێدوانی فەرمی: مستەفا عەبدوڵا، سەرۆكی فراكسیۆنی یەكگرتوو لە پەرلەمانی کوردستان بە ئاڤا میدیای ڕاگەیاند: فراكسیۆنەكانی یەكگرتووی ئیسلامی و كۆمەڵی دادگەری و نەوەی نوێ، ڕەتیان كردووەتەوە لە كۆبوونەوەكەی ئەمڕۆی ئەنجوومەنی وەزیران بەشدار بن.

 

بۆچوونی لایەنی بەرامبەر: سەبارەت بەو لایەنانەی كە بەشدار نەبوون، پێشەوا هەورامانی ـ گوتەبێژی حكومەتی هەرێمی كوردستان بە ئاڤا میدیای ڕاگەیاند: ئەم كۆبوونەوەیە بۆ ئەوەیە گفتوگۆ بكەین تا بزانین چارەسەر چییە سەبارەت بەو ڕەفتارەی بەغدا بەرامبەر بە خەڵكی هەرێمی كوردستان دەیكات، سەرۆكوەزیرانی مەسرور بارزانی لە كۆبوونەوەكەدا بە ڕوونی گوتی، ئەوانەی هەست بە بەرپرسیاریەتی دەكەن ئەمڕۆ لە كۆبوونەوەكەدا ئامادەن.