سوودانی: ڕووداوی بێوێنە و هەڵکشاو لە ڕۆژهەڵاتی ناوەڕاستدا ڕوودەدەن

ئاڤا نیوز

سەرۆکوەزیرانی عێراق لە رۆژنامەی تێلێگرافی بەریتانی وتارێکی نووسیوە، پلان و پەیامی سەردانەکەی بۆ بەریتانیا لە چەند گۆشەیەکەوە  خستووەتەڕوو. ئاماژە بەوەش دەکات کە ڕووداوی بێوێنە و هەڵکشاو لە ڕۆژهەڵاتی ناوەڕاستدا ڕوودەدەن.

 

وێنە گەورەکە: بڕیارە سوودانی لە سەردانەکەیدا بۆ شانشینی یەکگرتووی بەریتانیا لەگەڵ شا چارلزی سێیەم، سەرۆکوەزیران و بەرپرسانی باڵای حکومەتی بەریتانیا کۆببێتەوە. سوودانی دەڵێت ئەم سەردانە نیشانەی پابەندیی حکومەتەکەمە بە بەهێزکردنی هاوبەشیی ستراتیژیی نێوان عێراق و بەریتانیا.

 

لێدوانی فەرمی: سوودانی لە وتارەکەیدا دەڵێت:

- ڕووداوی بێوێنە و هەڵکشاو لە ڕۆژهەڵاتی ناوەڕاستدا ڕوودەدەن، نەک تەنیا هەڕەشە لە ناوچەکە دەکەن، بەڵکو مەترسی کەوتنەوەی ململانێی فراوانتریشیان هەیە. 

- بەشێکی زۆری ئامانجی سەردانەکەی سوودانی، بابەتی ئابوورییە و دەیەوێت بەریتانیا بەشداربێت لە گەشەپێدانی عێراق و جۆراوجۆرکردنی سەرچاوەکانی داهاتیدا، لەگەڵ کیەر ستارمەر و بەرپرسانی باڵای حکومەت باسی ڕێگاکانی نۆژەنکردنەوەی ژێرخان و گەشەپێدانی عێراق دەکات بەتایبەت وزە کە هێشتا بڕبڕەی پشتی ئابووریی عێراقە.

 

ئەوەی پێویستە بیزانیت: لە سەردانەکەدا ژمارەیەک لە وەزیرانی حکومەت، ئەندامانی پەرلەمان، پارێزگاری بەسرە، ژمارەیەک ڕاوێژکار و نوێنەرانی کەرتی تایبەت و بازرگان و کارساز لە سەرجەم کەرتە ئابوورییەکان، یاوەری شاندەکەی سەرۆکوەزیرانی عێراقن بۆ بەریتانیا.