دەست بە دابەشکردنی بەشەخۆراکی هاونیشتمانیان دەکرێت

ئاڤا نیوز

دەست بە دابەشکردنی بەشەخۆراکی هاونیشتمانیان بۆ ساڵی نوێ دەکرێت و چاوەڕوان دەکرێت بۆ مانگی ڕەمەزانیش بەشەخۆراکی زیاتر بدرێت.

چیرۆکی سەرەکی: ساڵانە لە عێراق و هەرێمی کوردستان 10 بەشە خۆراک بە هاووڵاتیان لە تەواوی پارێزگا و ناوچە جیاوازەکاندا دابەش دەکرێت، هاوکات بەشەخۆراكی سەبەتەی 10ـەیەم بۆ ساڵی 2024 کە پێكهاتووە لە ڕۆنی زەیت، شەكر، برنج، نیسک، دۆشاوی تەماتە، نۆک، ئارینۆک دابەش دەکرێت.

لێدوانی فەرمی: نەوزاد شێخ کامیل، بەڕێوەبەری گشتیی بازرگانیی هەرێمی کوردستان بە ئاڤا میدیای ڕاگەیاند، گەنمی پێویست لە سایلۆکان وەرگیراوە و دابەشکردنی ئارد بەسەر هاونیشتمانیاندا بۆ مانگی یەک دەستیپێکردووە، لە ئایندەیەکی نزیکیشدا دەست بە دابەشکردنی بەشەخۆراکی ساڵی نوێ دەکرێت.

زانیاریی بەدەستهاتوو: بە نزیکبوونەوەی مانگی ڕەمەزانی هەموو ساڵێک، بەشەخۆراکی زیاتر بە هاووڵاتیان دراوە، چاوەڕوان دەکرێت بۆ ئەمساڵیش بەشەخۆراکی زیاتربدرێت، ساڵی ڕابردووش مەعکەڕۆنی، شەعرییە، ئاردی سفر، نیسک و نۆک دراوە.