مووچەی مانگی یەکی ئەمساڵ کێشەی تێدەکەوێت

ئاڤا نیوز 

 

مووچەی مانگی یەکی ئەمساڵ کێشەی تێکەوتووە، تاوەکو ئێستا هیچ شتێک دیارنییە چۆن بنێردرێت، ئەو لێکتێگەیشتن و ڕێککەوتنانەی هەبوون بۆ ساڵی ڕابردوو بوون، بۆ ئەو مەبەستەش بڕیارە هەفتەی داهاتوو شاندێکی سیاسیی یەکێتی و پارتی بچنە بەغدا. 

 

وێنە گەورەکە: لە ساڵی 2024 هەولێر و بەغدا ڕێککەوتنێکیان واژۆکرد کە حکومەتی هەرێمی کوردستان پابەند کرا بە ڕادەستکردنی داهاتی ناوخۆ، لەبەرامبەردا بەغدا شایستە داراییەکانی هەرێمی کوردستان بە تەواوی بنێرێت. 

زانیاریی بەدەستهاتوو: بەپێی زانیارییەکانی ئاڤا نیوز حکومەتی هەرێمی کوردستان داوای کردووە لەگەڵ شاندی سیاسی سەردانی بەغدا بکات. کە بڕیارە سەردانی سوودانی بکەن و  پەیام و هەڵوێستیی حکومەتی هەرێمی کوردستانی پێبگەیێننن لەبارەی مووچە و بودجە،  کە دەبێت ئەمساڵ مووچە و شایستە داراییەکانی خەڵکی کوردستان دابین بکرێن و هاوشێوەی ساڵی ڕابردوو نەبێت.

 

 چوونی شاندەکە دەکەوێتە هەفتەی داهاتوو، چونکە ئێستا محەممەد شیاع سوودانی بە گەشتێکی فەرمی لە بەریتانیایە و تا کۆتایی ئەم هەفتەیە ناگەڕێتەوە، هەروەها تەیف سامی، وەزیری دارایی عێراقیش بەهەمانشێوە لە دەرەوەیە و ئەم پێنجشەممەیە دەگەڕێتەوە.

لەلایەکی دیکەوە:  شاندێکی تەکنیکیش لەگەڵیان دەڕوات بۆ دۆزینەوەی میکانیزمێک بۆ مووچەی مانگی یەک و کۆی مووچەکانی ئەمساڵ، ڕێکبکەون کە چۆن ئەمساڵ مووچە بنێردرێت. دیارنییە هاوشێوەی ساڵی ڕابردوو دەبێت یان ڕێککەوتنێکی نوێ دەکرێت.

 

ئەوەش بزانە: ئەمڕۆ کە 14ی مانگە تاوەکو ئێستا لیستی مووچەی مانگی یەک نەنێردراوە و دیار نییە کەی دەنێردرێت.