لێکۆڵەرێکی فەڵەستینیی بۆ ئاڤا: ئاگربەستەکەی نێوان حەماس و ئیسرائیل لەرزۆک و لاوازە

ئاڤا نیوز

هەرچەندە ئاگربەستەکەی نێوان ئیسرائیل و حەماس کە بڕیارە 19ی ئەم مانگە بخرێتە بواری جێبەجێکردنەوە، وەک ئومێدێک بۆ ملیۆنان کەس سەیر دەکرێت، بەڵام بەشێک لە لێکۆڵەران باوەڕیان وایە ئاگربەستەکە بنەماکەی لەرزۆکە و گریمانەی سەرکەوتنی لاوازە.

 

وێنە گەورەکە: ساڵێک و سێ مانگە شەڕ لە غەززە هەڵگیرساوە، بە نێوەندگیری ئەمریکا و میسر و قەتەر و دوای چەندین مانگ گفتوگۆ، شەوی ڕابردوو حەماس و ئیسرائیل بۆ ڕاگەیاندنی ئاگربەست گەیشتنە ڕێککەوتن، ئاگربەستەکە سێ قۆناغ لەخۆدەگرێت و هەر قۆناغێکیش 42 ڕۆژ دەخایەنێت.

 

لێدوانی فەرمی: زەید ئەیوبی، لێکۆڵەری سیاسی لە قودسەوە میوانی گەشتی هەواڵەکانی کاتژمێر 12:00ی ئاڤا میدیا بوو و ئاماژەی بەوەکرد:

- ئیسرائیل پڕۆژەی ڕۆژهەڵاتی ناوەڕاستی نوێ و حەماسیش خەونی مانەوەی دەسەڵاتەکەی لە غەززە هەیە، ئاگربەستەکەش لەرزۆکە چونکە پاساوی ئیسرائیل بۆ فراوانخوازییەکانی ناهێڵێت ئەوەش شتێکە سەرۆکوەزیرانی ئەو وڵاتە نایەوێت.

 

- تەنیا فشارەکانی ئیدارەی داهاتووی ترەمپ هۆکاری ڕاگەیاندنی ئاگربەستەکەیە، بەڵام بۆ قۆناغی دووەم ڕوون نییە ئیسرائیل و حەماس چ دەکەن،  قۆناغی یەکەمی ئاگربەستەکە دەرفەت بە هەشت هەزار و 400 ئەندامی حەماس دەدات لە غەززە بچنە دەرەوە ئەوانیش بریتین لە ڕۆژانە دەرچوونی 50 چەکداری بریندار لەگەڵ سێ ئەندامی خێزانەکەی، ئەوەش مانای وایە ئەو گرووپە لە غەززە بوونی نامێنێت.

 

- ئاگربەستەکە جێبەجێ ناکرێت و جەنگ لە ناوچەکەدا بەردەوام دەبێت، هۆکارەکەشی خواستی ئیسرائیلە بۆ مانەوەی سوپاکەی لە غەززە بۆ پاراستنی کۆمەڵگاکانی نیشتەجێبوون، فراوانخوازی لە نیلەوە بۆ فوڕات و دروستکردنی کەناڵێکی ئاوی کە بە باکووری غەززەدا تێدەپەڕێت و وەک جێگرەوەی کەناڵی سوێسی میسر .