قەتەر: خۆشحاڵین دوای 13 ساڵ پەیوەندییەكانمان لەگەڵ سووریا ئاسایی دەبێتەوە

ئاڤا نیوز

دوای 13 ساڵ لە پچڕانی پەیوەندییە دیپلۆماسییەكانی لەگەڵ سووریا، یەكەم بەرپرسی باڵای قەتەر دەچێتە دیمەشق و لەگەڵ فەرماندەی ئیدارەی نوێی سووریا كۆدەبێتەوە.

وێنە گەورەكە: شێخ محەممەد بن عەبدولڕەحمان ئال سانی، سەرۆكوەزیرانی قەتەر ئەمڕۆ پێنجشەممە 16-1-2025 بە سەردانێكی فەرمی گەیشتە دیمەشق و لەگەڵ ئەحمەد شەرع، فەرماندەی ئیدارەی نوێی سووریا كۆبووەوە.

لێدوانی فەرمی: لە كۆنگرەیەكی ڕۆژنامەوانی هاوبەشدا، سەرۆکوەزیرانی قەتەر ئامادەیی وڵاتەكەی بۆ هەر جۆرە هاوكارییەك لەگەڵ ئیدارەی نوێی سووریا لە پرسە جۆراوجۆرەكاندا دەربڕی، لەنێویشیاندا پرسی هەڵگرتنی سزاكانی سەر سووریا.

- شێخ محەممەد  ئال سانی ئاشكرای دەكات، لە ئاییندەیەكی نزیكدا میری قەتەر سەردانی سووریا دەكات، خۆشخاڵی خۆی دەربڕی بەوەی كە دوای پچڕانی پەیوەندییەكانی نێوان هەردوو وڵات بۆ ماوەی 13 ساڵ، دۆخێكی نوێ هاتۆتە ئاراوە.

- قەتەر ئامادەیی دەربڕی بۆ ئەوەی لە دووبارە بونیاتنانەوەی ژێرخانی سووریا ڕۆڵێكی گرنگی هەبێت و بەیەكەوە ژمارەیەك پڕۆژەی گەورە لە سووریا جێبەجێ دەكەن.

- سەرۆكوەزیرانی قەتەر ئیدانەی دەست بەسەرداگرتنی ناوچەی جیاكراوەی جۆلان لەلایەن سوپای ئیسرائیلەوە كرد و بەپێویستی زانی ئیسرائیل دەستبەجێ هێزەكانی بكشێنێتەوە.

- ڕوونیشی كردەوە، ئیسرائیل بوونی میلیشیا ئێرانییەكان وەك بیانووێك بەكاردەهێنێت بۆ هێرشكردنە سەر سووریا و ئەوەش قبووڵكراو نییە.