عوسمان بایدەمیر و لەیلا زانا كۆبوونەوەكەی سەرۆك بارزانی و مەزڵووم عەبدی بەرز دەنرخێنن

ئاڤا نیوز

كاردانەوەكانی دوای كۆبوونەوەكەی دوێنێی سەرۆك بارزانی و مەزڵووم عەبدی بەردەوامە و هەریەك لە عوسمان بایدەمیر و لەیلا زانا، دوو سیاسەتوانی ناسراوی كورد لە باكووری كوردستان هەڵوێستی خۆیان لەمبارەیەوە ڕادەگەیێنن.

چیرۆکی سەرەکی: ئێوارەی پێنجشەممە 16-1-2025، لە پیرمام کۆبوونەوەیەکی گرنگ و مێژوویی کرا لەبارەی ئایندەی کورد لە سووریا و ناوچەکە، سەرۆک بارزانی لەگەڵ مەزڵووم عەبدی، فەرماندەی گشتیی هێزەکانی سووریای دیموکرات (هەسەدە) کۆبووەوە و دوایین بارودۆخی سووریا و ئایندەی کوردیان لەو وڵاتە تاوتوێ کرد.

كاریگەریی و لێكەوتەكان: دوای بڵاوبوونەوەی هەواڵی كۆبوونەوەكە، كوردانی هەر چوار پارچە "باشوور، باكوور، ڕۆژهەڵات و ڕۆژئاوای كوردستان" لە ڕێگەی تۆڕە كۆمەڵایەتییەكان بە بڵاوكردنەوەی وێنەی كۆبوونەوەكە و پەیامی یەكگرتوویی و تەبایی كورد دڵخۆشیی خۆیان دەردەبڕن، هاوكات چەندین سەركردە و كەسایەتی و سیاسەتوانانی كوردیش پەیام و پیرۆزبایی و دەستخۆشی سەبارەت بە كۆبوونەوەكە بڵاودەكەنەوە.

بڵاوكراوەی فەرمی: عوسمان بایدەمیر، سیاسەتوان و چالاكوانی مافەكانی كورد لە باكووری كوردستان لە لاپەڕەی خۆی لە تۆڕی كۆمەڵایەتیی (X) سەبارەت بە كۆبوونەوەكەی سەرۆك بارزانی و مەزڵووم عەبدی نووسیویەتی " پیرۆزبێت، ئەمە داواكاریی ملیۆنان كوردستانی بوو، ماڵتان هەزار جار ئاوا بێت، هیوای ئێمە ئەوەیە ئەمە هەمیشەیی بێت و دەرگای خێر بكاتەوە."

لەلایەكی دیكەوە: لەیلا زانا، سیاسەتوانی ناسراوی كورد لە لاپەڕەی خۆی لە تۆڕی كۆمەڵایەتیی (X) نووسیویەتی " سوپاس بۆ ئێوە، پیرۆز و هەمیشەیی بێت، پێكەوەژیانی گەلان ئامانجی ئێمەیە، ئێوە هیوای گەلانی ڕۆژهەڵاتی ناوەڕاستتان گەورە كرد."