بایدن: نەتەنیاهۆ پێی گوتم تۆش خەڵکی بێگوناهت کوشتووە

ئاڤا نیوز

جۆ بایدن، سەرۆکی ئەمریکا، لە چاوپێکەوتنێکیدا لەگەڵ کەناڵی (MSNBC)ـی ئەمریکی، باس لە گفتوگۆیەکی لەگەڵ بنیامین نەتانیاهۆی سەرۆکوەزیرانی ئیسرائیل دەکات. 

 

لێدوانی فەرمی: بایدن دەڵێت، چەند ڕۆژێک دوای هێرشی 7ـی ئۆکتۆبەری 2023 قسەی لەگەڵ نەتەنیاهۆ کردووە و داوای لێکردووە خۆی لە بۆردوومانکردنی هەڕەمەکییانەی غەززە و کوشتنی خەڵکی بێتاوان بپارێزێت، بەڵام نەتەنیاهۆ وەڵامی داوەتەوە و ئاماژەی بە جەنگی جیهانیی دووەم کردووە و بە بایدنی گوتووە تۆش وات کردووە، بەرلینت بە فراوانی بۆردوومان کردووە و بۆمبی ئەتۆمیشت بەکار هێناوە و هەزاران خەڵکی بێگوناهیشت کوشتووە چونکە پێویست بووە وا بکەیت تا شەڕەکە ببەیتەوە. 

 

ئەوەی پێویستە بیزانیت: بایدن دەڵێت، منیش لە وەڵامدا پێم گوت، "کە هەر لەبەر ئەمە بوو ئێمە نەتەوەیەکگرتووەکانمان درووست کرد تا ڕێگە لە شەڕ و کوشتنی کەسانی بێتاوان بگرین. بایدن دەشڵێت، هەوڵەکانی ئەو کاتی بۆ ئەوە بووە کە کەسانی مەدەنی نەکوژرێن، نەک بۆ ئەوەی ئاگربەست بێتە ئاراوە." 

 

پێدراوە ڕاستییەکان: لە 15 مانگی شەڕی غەززەدا، ئیسرائیل نزیکەی 47 هەزار فەلەستنی کوشت کە زۆربەیان ژن و منداڵ بوون، هەروەها زیاتر لە 110 هەزار کەسیشی بریندار کرد، سەرەڕای ئەمە شوێنە گشتییەکانی وەک قوتابخانە، نەخۆشخانە و مزگەوتەکانیشی بۆردوومان کردن، زیاتر لە دوو ملیۆن کەس لە دانیشتوانی غەزززەی ئاوارە کرد. 

 

ئەوەی لەبارەیەوە دەگوترێت: ڕەخنەی زۆر لە بایدن دەگیرێت بەوەی بە درێژایی ئەو 15 مانگە نەک هەر نەیتوانی شەڕی غەززە بوەستێنێت، بەڵکو چەکی بۆ ئیسرائیل دەنارد و سوپای ئیسرائیل بەو چەکانەی ئەمریکا خەڵکی فەلەستینی دەکوشت.