ئاڤا پەیوەندییەکی نهێنیی بافڵ تاڵەبانی و لاهوور شێخ جەنگی ئاشکرا دەکات

ئاڤا نیوز

دوای زیاتر لە سێ ساڵ ناکۆکیی قووڵ، بافڵ تاڵەبانی، سەرۆکی یەکێتیی نیشتمانیی کوردستان پەیوەندیی بە لاهوور شێخ جەنگی، سەرۆکی بەرەی گەل دەکات پێکەوە دابنیشن، بەڵام بەهۆی دانانی مەرجێک لەلایەن بافڵ تاڵەبانییەوە کۆبوونەوەکە ناکرێت.

زانیاریی تایبەت: ئاڤا میدیا لە سەرچاوەیەکەوە زانیویەتی، چەند ڕۆژێک دوای هەڵبژاردنی پەرلەمانی کوردستان بافڵ تاڵەبانی، سەرۆکی یەکێتی بە تەلەفۆن قسەی لەگەڵ لاهوور شێخ جەنگی، سەرۆکی بەرەی گەل کردووە، داوای کردووە بەیەکەوە دابنیشن، بەڵام بەو مەرجەی دوور لە چاوی خەڵک و میدیاکان بێت، لاهوور شێخ جەنگی ڕازی بووە بە دانیشتنەکە، بەڵام ئەو مەرجەی ڕەتکردووەتەوە و وتوویەتی با بە ئاشکرا دیدارەکە بکەین.

لەلایەکی دیکەوە: ئاڤا ئەوەشی زانیوە، لە چوارچێوەی پێکهێنانی کابینەی 10ـی حکومەتی هەرێمی کوردستان، یەکێتی بەنیازە سەردانی بەرەی گەل بکات کە لاهوور شێخ جەنگی سەرۆکایەتیی دەکات و لە هەڵبژاردنی پەرلەمانی کوردستان دوو کورسی بەدەستهێنا.

بۆچوونی بەرامبەر: ئەمڕۆ شەممە لە وەڵامی ڕۆژنامەنووساندا سەمیر هەورامی، بەڕێوەبەری نووسینگەی قوباد تاڵەبانی ڕەتیکردەوە هیچ نیازێکیان هەبێت لەگەڵ بەرەی گەل کۆببنەوە.

باکگراوند: ڕۆژی 8ـی تەمموزی 2021 لاهووور شێخ جەنگی کە هاوسەرۆکی یەکێتی بوو، لەلایەن بافڵ تاڵەبانییەوە دەرکرا، بەمەش پەیوەندی نێوان بافڵ تاڵەبانی و لاهوور شێخ جەنگی گەیشتە دۆخێکی خراپ، ساڵی ڕابردووش لاهوور شێخ جەنگی بەرەی گەلی دامەزراند.