دابەشکردنی نەوت لە سنووری پارێزگای هەولێر دەستپێدەکات

ئاڤا نیوز

کاروانی یەکەمی ئەو نەوتەی بەغدا ناردوویەتی، سبەی لە هەولێر و سۆران دابەش دەکرێت. لە هەولێر هاوڵاتیان لە بەنزینخانەکان وەریدەگرن، لە سۆران تەنکەرەکان دەچنە بەردەم ماڵەکان.

وێنە گەورەکە: وەزارەتی نەوتی عێراق ڕەزامەندنی لەسەر 50 ملیۆن لیتر نەوتی سپی وەک پشکی هەرێمی کوردستان داوە کە دەکاتە ڕێژەی (19%)ی بڕەکە، لە ناوچە شاخاوییەکانەوە بۆ سەنتەری پارێزگاکان درێژ دەبێتەوە و ئامانجەکە ئەوەیە سەرەتا بدرێتە خێزانەکانی ناوچە شاخەواییەکان ئەگەر بەشی کرد دەگوازرێتەوە سەنتەری شارەکان.

لێدوانی فەرمی: فەلاح مەحموود، بەڕێوەبەری گشتیی وەبەرهێنانی کانزایی لە وەزارەتی سامانە سرووشتییەکان بە ئاڤای گوت، "ئەو نەوتەی هاتووە پشکی هەولێرە، سبەی لە هەریر و چۆمان پرۆسەکە دەست پێدەکات و شەش بەنزینخانە لە هەریر تا پیرمام دیاریکراون بۆ ئەوەی هاووڵاتیان بەرمیل ببەن و نەوت وەربگرن."

زانیاریی زیاتر: هەر خێزانێک 100 لیتر نەوتی پێدەدرێت، تەنیا پارێزگای هەولێر پێویستی بە 105 ملیۆن لیتر نەوت هەیە، بەڵام تەنیا 15 ملیۆن و 800 هەزار لیتری بۆ دەنێردرێت.