ئێران ڕاپۆرتێکی نوێ لەبارەی تێکشکانی هێلیکۆپتەری ڕەئیسی بڵاودەکاتەوە

ئاڤا نیوز

بارەگای گشتی هێزە چەکدارەکانی ئێران لە بەیاننامەیەکدا هەرچەشنە گریمانەیەک لە بارەی تیرۆرکردن یان تێکشکاندنی هەلیکۆپتەرەکەی ئیبراهیم ڕەئیسی، سەرۆککۆماری پێشووی ئێران ڕەتدەکاتەوە.

ڕاگەیێنراوی فەرمی: ئەرکانی گشتیی هێزە چەکدارەکانی ئێران لە ڕاگەیێنراوێکدا ڕایگەیاند:

ماوەیەکە لە میدیاکان و تۆڕە کۆمەڵایەتییەکاندا باس لە شێواز و هۆکاری گیان لەدەستدانی ئیبراهیم ڕەئیسی دەکرێت، ئەو گومانانەی باس لە تیرۆرکردن یاخود تێکشکاندنی هەلیکۆپتەرەکەی دەکەن دوورە لە ڕاستییەوە.

لەلایەکی دیکەوە: پێشتر موجتەبا موسەوی، برای مەهدی موسەوی، بەرپرسی تیمی پاسەوانی ئیبراهیم ڕەئیسی لە چاوپێکەوتنێکدا ڕایگەیاندبوو، براکەی بەتەواوی دژی گەشتەکەی ئیبراهیم ڕەئیسی بووە بۆ سنووری ئازەربایجان، بەڵام لەسەر پێداگریی نووسینگەی سەرۆککۆمار، دواجار ئەرکەکەی وەک بەرپرسی تیمی پاسەوانی جێبەجێکردووە.

ئەوەی لەوبارەیەوە دەگوترێت: گومانەکان لەسەر شێواز و هۆکاری گیان لەدەستدانی ئیبراهیم رەئیسی سەرۆکی ئێران هێشتا باس دەکرێن و زۆرێک پێیان وایە کە هەلیکۆپتەرەکەی سەرۆکی ئێران لەلایەن ئیسرائیلەوە خرابێتە خوارەوە و حکومەتی ئێرانیش سوورە لەسەر ئەوەی هۆکاری کەوتنە خوارەوەی هەلیکۆپتەرەکە بەهۆی خراپی کەشوهەواوە بووە.