بەرپرسێکی باڵای پەیەدە بەهۆی بۆردوومانی تورکیا کوژرا

ئاڤا نیوز

لە بۆردوومان و هێرشە ئاسمانییەکانی تورکیا بۆ سەر ڕۆژئاوای کوردستان بەرپرسێکی باڵای پەیەدە و ژمارەیەک هاووڵاتی سیڤیل گیانیان لەدەستداوە و سێ کەسیش بێ سەروشوێنن.

وێنە گەورەکە: هێرشەکانی تورکیا و گرووپە چەکدارەکانی نزیک لەو وڵاتە بۆ سەر هێزەکانی هەسەدە لە دەوروبەری بەنداوی تشرین بەردەوامە. لە هێرشەکانی ئەمڕۆ بۆ سەر بەنداوی تشرین چوار کەس گیانیان لەدەستداوە.

زانیاریی تایبەت: سەرچاوەیەک بۆ ئاڤا پشتڕاستی کردەوە کە مەنیجە حەیدەر، هاوسەرۆکی نووسینگەی پەیەدە لە شاری قامشلۆ لە بۆردوومانی ئەمڕۆی تورکیا بۆ سەر بەنداوی تشرین گیانی لەدەستدا.

زانیاریی زیاتر: سێ کەسی دیکەش بەهۆی بۆردوومانەکەی ئەمڕۆی هێزەکانی تورکیا کوژراون کە یەکێک لەوانە هونەرمەند و ئەکتەری بەناوبانگی ڕۆژئاوای کوردستانە بە ناوی (باڤێ تەیاری). هاوکات سێ کەسیش بێ سەروشوێنن و تا ئێستا چارەنووسیان نادیارە.

 

باکگراوند: لە سەرەتای دەستپێکردنی شەڕ لە نێوان هێزەکانی هەسەدە و گرووپە چەکدارەکانی نزیک لەو وڵاتە لە 12-12-2024، بەپێی ئامارەکانی ڕوانگەی سووری بۆ مافەکانی مرۆڤ، تا ئێستا 411 کەس لە هەردوولا کوژراون کە 300 کەسییان ئەندامی گرووپە چەکدارەکانن.