ئەندازیارەکەی حەماس کێیە کە لە قۆناغی دووەم و سێیەم داوای ئازادکردنی دەکرێت؟

ئاڤا نیوز

حەماس داوای ئازادکردنی سەرکردەیەکی دیاری بزووتنەوەکەی دەکات کە بە "ئەندازیاری حەماس" ناسراوە و شارەزایە لە دروستکردنی تەقەمەنی، تا ئێستا 67 سزای تا هەتا هەتایی بەسەردا سەپێنراوە.

چیرۆکی سەرەکی: دوابەدوای ڕەزامەندیی حکومەتی ئیسرائیل لەسەر جێبەجێکردنی ئاگربەست لە غەززە و دەستکردن بە ئازادکردنی بارمتە ئیسرائیلییەکان و دیلەکانی فەلەستینی. میدیا ئیسرائیلییەکان ناسنامەی ئەو زیندانییانەیان ئاشکرا کردووە کە بە "کەسایەتی گرنگ" وەسفی کردوون حەماس لە قۆناغی دووەم و سێیەمدا داوای ئازادکردنیان دەکات.

ئەوەی لەبارەیەوە دەگوترێت: بە گوێرەی میدیا ئیسرائیلییەکان لە نێو ئەو کەسایەتیانەدا ئیبراهیم حامد هەیە بە "مەترسیدارترین زیندانی" دادەنرێت کە ئێستا لەلایەن ئیسرائیلەوە دەستبەسەرە، بەپێی ڕۆژنامەی تایمز ئۆفی ئیسرائیل، حامد ڕووبەڕووی دووەم قورسترین سزا کراوەتەوە. فەرماندەی باڵی سەربازی حەماس بووە لە سەرتاسەری کەرتی ڕۆژئاوا و تۆمەتبارە بە کوشتنی 46 ئیسرائیلی و 54 سزای هەتاهەتایی بەسەردا سەپێنراوە.

لەلایەکی دیکەوە: کەسایەتی دووەم عەبدوڵڵا غالب بەرغوسی-یە کە نازناوی "ئەندازیاری حەماس"ی لێنراوە، زۆرترین سزای لە جیهاندا هەیە، کە 67 سزای هەتاهەتایی بەسەردا سەپێنراوە.

ئەمەش بزانە: بە گوێرەی کەناڵی 12ـی ئیسرائیلی، بەرغوسی بە یەکێک شارەزاترین ئەو کەسانە دادەنرێت لە دروستکردنی تەقەمەنی لە نێو بزووتنەوەی حەماس. لە ساڵی 2003 لە لایەن ئیسرائیلەوە دەستگیر کراوە، دوای ئەوەی بە تۆمەتی تێوەگلانی لە زنجیرەیەک هێرشدا سزا درا، لەوانە تەقاندنەوەی چێشتخانەی سبارۆ لە قودس لە ساڵی 2001 کە بووە هۆی کوژرانی 15 ئیسرائیلی و برینداربوونی 130 کەسی دیکە، بەپێی میدیا ئیسرائیلییەکان، بەرغوسی بەرپرسە لە گیانلەدەستدانی 66 ئیسرائیلی.