زبڵ و خاشاک دانیشووانی کەرکووک هەراسان دەکات

ئاڤا نیوز

 

کۆبوونەوە و فڕێدانی زبڵ و خاشاک لە کۆڵان و شەقامەکانی کەرکووک دانیشتووانی شارەکەی نیگەران کردووە، بەشێک لە هاووڵاتییان خودی خۆیان و کۆمپانیاکانی پاککەرەوە لە کۆبوونەوەی زبڵ و خاشاک بە کەمتەرخەم دەزانن.

وێنە گەورەکە: دوای دەستبەکاربوونی ڕێبوار تەها، وەک پارێزگاری کەرکووک،  شارەکە هەناسەیەکی تازەی بەبەردا هات. یەکەم بڕیاری وەک مزگێنییەک بۆ هاووڵاتییان ئەوەبوو: شارەکە لە ماوەی دوو هەفتەدا پاک دەکرێتەوە. ئەم هەنگاوە خێرایە هیوای گەورەی لە دڵی خەڵکدا چاند، بەڵام کۆمپانیاکانی پاککەرەوە تەنها لە سەرەتای بریارەکەی پاريزگار گەرم و گوڕییان پێوە دیار بوو، ئێستا جارێکی دیکە دۆخەکە وەکو پێشووی لێهاتەوە و شەقام و کوچە و کۆڵانەکان گەڕانەوە هەمان دیمەنی پێشوو.

 

ئەوەی لەبارەیەوە دەگوترێت: بەشێک لە هاووڵاتیان کۆمپانیاکان و خوودی خۆشیان بە کەمتەرخەم دەزانن، بەوپێیەی بەشێک لە هاووڵاتییان هاوکار نین و شەقام و کوچە کۆڵانەکان پاک ڕاناگرن.

 

زانیاریی زیاتر: ئیدارەی پێشووی کەرکووک گرێبەستی لەگەڵ چەند کۆمپانیایەک کردوە بۆ پاککردنەوەی شارەکە، بەڵام بە تەواوی کۆمپانیاکانەوە تەنها 260 کرێکاریان هەیە ، ئەمە جگە لەوەی ئامێر و ئۆتۆمبێلەکانی ئەو کۆمپانیایانە کۆنن و پێداویستییەکان پڕناکەنەوە.

 

ئەوەی پێویستە بیزانیت: ڕۆژانە بە نزیکەیی 1000 تا 1200 تۆن زبڵ و خاشاک لە تەواوی کەرکووک کۆدەکرێتەوە، بەڵام بۆ ئەوەی تەواوی شارەکە پاک ڕابگیرێت پێویستە ڕۆژانە بە نزیکەیی 2000 تۆن هەڵبگیرێتەوە.