دەستەی ناوچە کوردستانییەکان: ماف بۆ خاوەن ماف گەڕایەوە

ئاڤا نیوز 

 

دەستەی گشتیی ناوچە کوردستانییەکانی لە بەیاننامەیەکدا باس لەوە دەکات، دوای نیو سەدە زەوی بۆ خاوەنە ڕاستەقینەکانی کورد و تورکمان گەڕایەوە.

 

بابەتی سەرەکی: ئەمڕۆ 21-1-2025، پەرلەمانی عێراق بڕیارەکانی سەردەمی شۆڕشی بەعس، لەبارەی زەوییە کشتووکاڵییەکانی کورد و تورکمان لە ناوچە کوردستانییەکانی هەڵوەشاندنەوە. 

 

ڕاگەیێنراوی فەرمی: دەستەی ناوچە کوردستانییەکان ڕایگەیاند:

 

- دوای زیاتر لە نیو سەدە، زەوی و زاری ناوچەکە، بۆ خاوەنە ڕاستەقینەکانی لە کورد و تورکمان گەڕایەوە. 

 

- ئەم هەنگاوە دەرئەنجامی هەوڵی هاوبەشی حکومەتی هەرێمی کوردستان و نوێنەرانی کوردە بەغدا، ئێمەش پێمانوایە ئامانجێکی گەورەمان بەدیهاتووە، ئەم هەنگاوە کاری پێکەوەیی نێوان پێکهاتەکانی عێراق قوڵتر و متمانەی نێوان لایەنە سیاسییەکان فراوانتر دەکات. 

 

- پیرۆزباییەکی گەرم ئاراستەی تەواوی خەڵکی کوردستان بەگشتی و ناوچە کوردستانییەکانی دەرەوەی ئیدارەی هەرێم بەتایبەتی دەکەین، بە ئومێدەوە چاوەڕێی بەدیهاتنی سەرجەم مافەکانی خەڵکی کوردستان لە چوارچێوەی دەستوور و  جێبەجێکردنی ماددەی 140ی دەستووری هەمیشەی عێراق دەکەین.

  
- ئەوە بە بیری هەموو لایەک دەهێنینەوە کە ئەم دەستکەوتەی ئەمڕۆ بەهۆی هەوڵی پێکەوەیی و خەباتی هاوبەشمان بووە، چونکە پێکەوەیمان گەرەنتی پاراستنی کوردستان و بەدیهاتنی ئامانجە بەدینەهاتووەکانمانە.