ماڵپەڕێکی ئیماراتی: دوو گرووپی چەکداریی بیانیی سووریایان بەرەو عێراق جێهێشتووە

ئاڤا نیوز

دوای ڕووخانی دەسەڵاتەکەی ئەسەد لە سووریا، ئەو گرووپە شیعییە دەرەکییانەی بۆ پشتیوانی دیمەشق ڕەوانەی وڵاتەکە کرابوون سووریایان جێهێشووە، ماڵپەڕێکی ئیماراتیش دەڵێت، هەردوو گرووپی فاتمیوون و زەینەبییوون کە دوو گرووپی ئەفغانی و پاکستانین لە بنکەیەکی سەربازی عێراقدا جێگیرکراون.

چیرۆکی سەرەکی: گرووپی فاتمیوون لە چەکدارانی شیعەی ئەفغانستانن و زەینەبییوونیش ئەندامەکانی پاکستانین، وەک دەوترێت ئەو دوو گرووپە لەلایەن سوپای پاسدارانی ئێرانەوە دروستکراون و لە سیاسەتی هەرێمی تاراندا وەک کارتێک بەکاردەهێنرێن، لەڕابردووش لە شەڕ و ململانێکانی سووریادا ڕۆڵێکی سەرەکییان بۆ پشتیوانی ئەسەد بینیووە.

زانیاریی بەدەستهاتوو: چەند سەرچاوەیەکی ئەمنیی عێراق بە ماڵپەڕی ئیرەم نیوزی ئیماراتیان ڕاگەیاندووە، ئەندامانی هەردوو گرووپی فاتمیوون و زەینەبییوون دوای دەرچوونیان لە سووریا بۆ بنکەی ئەشرەف لە پارێزگای دیالە گوازراونەتەوە، تارانیش "داوای لە هاوپەیمانەکانی کردووە پەلەنەکەن لە ناردنەوەی ئەو چەکدارانە بۆ وڵاتەکانیان".

زانیاریی زیاتر: دوای گۆڕانکارییەکانی سووریا هەموو گرووپە چەکدارەکانی عێراق کە بۆ پشتیوانی ئەسەد لەو وڵاتە بوون، سووریان جێهێشتووە بۆ وڵات گەڕاونەتەوە، هاوکات هەر بەگوێرەی سەرچاوەکان لە ماوەی مانگی ڕابردوو ژمارەیەکی زۆر چەکداری ئەو دوو گرووپە بیانییەش هێنراونەتە بنکەی ئەشرەف و بە هەماهەنگی گرووپە چەکدارەکانی عێراق لەو بنکەیە جێگیرکراون، ئێستاش "ئەو گرووپانە چاوەڕێی گۆڕانکاری نوێ یان فەرمانی تارانن".

بەگوێرەی ڕاپۆرتی میدیاکانی ڕۆژئاوا، ئێران بەرەو ئەوە هەنگاو دەنێت کە ئەندامانی لیوای فاتمیوون بۆ ململانێ هەرێمایەتییەکانی بەکاربهێنێت لەوانەش پشتیوانی حوسییەکانی یەمەن یان بەهێزکردنی گرووپە چەکدارەکانی عێراق، بەڵام کەمال تائی، شارەزای سەربازیی هۆشداری دەدات لە مانەوەی ئەو دوو گرووپە لە عێراق و وەک هەڕەشەیەک بۆسەر سەروەری نیشتیمانی وڵاتەکە ناویان دەبات، بەتایبەتیش کە ئەو گرووپانە لەدەرەوەی کۆنتڕۆڵی دەوڵەت کار و جوڵە دەکەن.

ئەمەش بزانە: بنکەی سەربازیی ئەشرەف کە لە شەڕی ئێران و عێراقدا لەسەر ڕووبەری 36 کیلۆمەتر چوارگۆشە دروستکراوە، سەرەتا گرووپی موجاهیدینی خەڵقی دژبەری ئێرانی تێدا کۆکراوەتەوە، دواتریش ماوەیەک لەژێر دەستی هێزەکانی ئەمریکا و دواتریش حکومەتی عێراقدا بووە، لە ساڵی 2013شەوە بووەتە بنکەیەکی سەرەکی گرووپەکانی نزیک لە ئێران لە عێراق و وەک بنکەی ئۆپەراسیۆن و کۆگای چەک و تەقەمەنی بەکاری دەهێنن.