نووسراوێکی خێرا لە وەزارەتی داراییەوە لەبارەی مووچە

ئاڤا نیوز

وەکو ئامادەکارییەک بۆ کۆبوونەوەی ڕۆژی یەکشەممە 26-1-2025، وەزارەتی دارایی و ئابووری نووسراوێکی خێرا و بەپەلە ئاراستەی سەرجەم وەزارەت و دەستەکان دەکات.

نووسراوی فەرمی: وەزارەتی دارایی و ئابووریی هەرێمی کوردستان لەسەر داواکاریی وەزارەتی دارایی عێراق، ئەمڕۆ چوارشەممە نووسراوێکی خێرا و بەپەلەی بۆ سەرجەم وەزارەت و دەستەکان ناردووە، نووسراوە سێ خاڵ لەخۆدەگرێت و داوای کردووە لە ماوەی کەمتر لە 24 کاتژمێر وەڵامی پێویستیان بۆ بنێرن

داواکارییەکان چین؟

یەکەم: لیستی مووچەی مانگی یەک بەپێی سیستمی پەیڕۆڵ ئامادە بکەن بەبێ ناوی ئەوانەی کە بڕیارە ئەمساڵ خانەنشین بکرێن. سیستمی پەیڕۆڵ ئەلیکترۆنییە و یەکەمجارە حکومەتی هەرێمی کوردستان بە ئۆنڵاین لیستی مووچەی فەرمانبەران ئامادە دەکات، ئەمەش زۆر کێشە چارەسەر دەکات. 

دووەم: لیستی خانەنشینانی نوێ بە هەموو زانیارییەکانەوە ئامادە بکەن، کە بڕیارە لەسەر داواکاریی بەغدا ئەم مانگە سێ تەمەن پێکەوە خانەنشین بکرێن و 35 بۆ 37 هەزار کەس دەگرێتەوە. ئەوانەی تاوەکو 31-12-2024 تەمەنیان گەیشتووەتە 60 ساڵ خانەنشین دەبن. 

سێیەم: لیستی ئەو فەرمانبەرانەی ئەمساڵ واتا 2025 خانەنشین دەبن،  واتا تا کۆتایی ئەمساڵ 31-12-2025، لیستی ئەوانیش بە جیاواز ئامادە بکەن، لەگەڵ میزان موراجەعە (تەرازووی پێداچوونەوە) کە لیستی خەرجییەکان دەگرێتەوە.

ئەمەش بزانە: لە نووسراوەکە باس لەوەش کراوە، پێویستە هەموو یەکە ژمێریارییەکانی وەزارەت و دەستەکان لەسەر خەت بن بۆ وەڵامدانەوەی هەر پرسیارێک کە ناڕوون بێت، واتا کاتێک داواکارییەکان دەنێرنەوە ئەگەر پرسیاریان هەبوو، ڕوونکردنەوەیان پێبدەن.