هەسەدە: بە زەبری هێز چەک دانانیێن

ئاڤا نیوز

هێزەکانی سووریای دیموکرات - هەسەدە، سەبارەت بە دانانی چەک، وەڵامی وەزیری بەرگریی ئیدارەی نوێی سووریا دەداتەوە دەڵێت "کەس ناتوانێت بە زەبری هێز چەکمان بکات".

ئەوەی پێویستە بیزانیت: دوێنێ چوارشەممە، 2025-01-22، مورهەف ئەبو قوسرە، وەزیری بەرگریی دەسەڵاتی نوێی سووریا لە دیمەشق بۆ میدیاکان گوتبووی "لەگەڵ هەسەدە لە دانوستانداین و دەبێت چەکیان لێ وەربگیرێتەوە".

 

لێدوانی فەرمی: سایل زوبەیع، جێگری گوتەبێژی هێزەكانی سوریای دیموكرات - هەسەدە، لەبەرامبەر قسەكانی وەزیری بەرگریی سووریا بە كەناڵی "عەرەبیە"ـی گوتووە

 

- "بەزۆر چەكەكانمان دانانێین و دەستیش بۆ چەكەكانمان نابەین ئەگەر ئەوان چەک لە دژمان بەكارنەهێنن".

 

- لە گەڕی یەكەمی دانوستانەكاندا لەگەڵ ئیدارەی نوێی سووریا گەیشتینە چەند خاڵێكی ئەرێنی و گەڕی دووەمی دانوستانەكانیش بەمزووانە دەکرێن و گەشبینن.

باکگراوند: حکومەتی نوێی سووریا بۆ ڕێکخستنەوەی هێزی نیشتمانیی وڵاتەکەی لەگەڵ وڵاتانی ڕۆژهەڵات و ڕۆژئاوایی لە گفتوگۆدایە. لەبارەی هەسەدەش، وەزیری بەرگریی سووریا دەڵێت: پێویستە بەر لە ئەنجامدانی کۆنفرانسی دیالۆگی نیشتمانی کە هەموو پێکهاتەکانی سووریا لەخۆدەگرێت، هەسەدە خۆی هەڵبوەشێنێتەوە.