وەزیری دەرەوەی فەڕەنسا: بڕیاری ئایندەی سووریا لەدەست سوورییەكانە

ئاڤا نیوز

وەزیری دەرەوەی فەڕەنسا ئاماژە بەوە دەکات داهاتووی سووریا پەیوەستە بە خودی سوورییەکان لەمبارەیەوەش لەگەڵ بەرپرسانی ئەو وڵاتە باسم لە پڕۆسەی گواستنەوەی دەسەڵات و پێکهێنانی حکومەتی نوێ کردووە.

چیرۆکی سەرەکی: ڕۆژی چوارشەممە، 2025-01-22، ژان نۆئێل بارۆ، وەزیری دەرەوەی فەرەنسا، لە کۆربەندی داڤۆس لەگەڵ کۆمەلێک سەرۆک و سەرکردە و بەشداربووانی کۆربەندەکە دۆخی ئێستای سووریایان تاوتوێ کرد.

لێدوانی فەرمی: ژان نۆئێل بارۆ، وەزیری دەرەوەی فەڕەنسا کە ئێستا لە داڤۆسە گوتی: هەموومان ئاواتەخوازین گەلی سووریا لەدوای نەمانی بەشار ئەسەد پێکەوە بە ئاشتی و ئارامی بژین، دەبێت خودی سوورییەکان چارەنووسی وڵاتەکەیان دیاری بکەن.

لەلایەکی دیکەوە: سەرەتای ئەم مانگە ژان نۆئێل بارۆ سەردانی دیمەشقی کرد و لە لێدوانێکی تایبەت بە نۆرس پرێسی ڕاگەیاندبوو، دەبێت کورد ڕۆڵی هەبێت لە بوونیادنانی سووریای نوێدا.

 

باکگراوند: هەوڵە نێوخۆیی و نێودەوڵەتییەکان، بۆ پێکهێنانی حکومەتی نوێی سووریا بە بەشداری هەموو گەلانی ئەو وڵاتە بە کوردیشەوە کە دووەم گەورەترین نەتەوەیە بەردەوامە، داوا دەکرێت بە زوویی کێشە نێوخۆیەکان چارەسەر بکرێن و دەستوورێکی نوێش بنووسرێتەوە، مافی سەرجەم نەتەوە و پێکهاتە جیاوازەکان تێیدا پارێزراو بێت.