لیژنەی یاسایی پەرلەمانی عێراق بۆ ئاڤا: یاسای لێبوردنی گشتی هەموو تاوانباران بەبێ مەرجی یاسایی ناگرێتەوە

ئاڤا نیوز

سەبارەت بە یاسای لێبوردنی گشتی ئەندامێکی لیژنەی یاسایی پەرلەمانی عێراق بۆ ئاڤا ڕوونکردنەوە دەدات و دەڵێت، یاسای لێبوردنی گشتی هەموو تاوانباران بەبێ مەرجی یاسایی ناگرێتەوە.

چیرۆکی سەرەکی: پەرلەمانی عێراق لە کۆبوونەوەیەکی مشتومڕ ئامێزدا ڕۆژی 21-1-2025 هەر سێ یاسای گەڕانەوەی موڵکی داگیرکراو بۆ خاوەنەکانیان لە کەرکووک و ناوچەکانی ماددەی 140، لێبوردنی گشتی و یاسای باری کەسێتی، بەیەک پاکێج پەسەند کرد.

لێدوانی تایبەت: محەممەد عەنوز، ئەندامی لیژنەی یاسایی پەرلەمانی عێراق  بەئاڤا میدیای ڕاگەیاند:

- هەرکەسێک بە تاوانی گەندەڵی زیندانی کرابێت یاخود پارەی گشتی بەفیڕۆ دابێت، دوای ئەوەی تەواوی ئەو بڕە پارەیەی کە بەهۆیەوە زیندانی کراوە دەگەڕێنێتەوە و ئازاد دەکرێت.

- ئەو کەسانەی بەتاوانی ئاڵودەبوون بە ماددەی هۆشبەر زیندانی کراون، ڕاستەوخۆ ئازاد ناکرێن، بەڵکو دوای ئەوەی لە ناوەندە تایبەتمەندەکانی ئاڵودەبوونەوە چارەسەری تەواو وەردەگرن ئازاد دەکرێن.

- سەبارەت بەوانەی بە تاوانی تیرۆر زیندانی کراون، بە هیچ شێوەیەک ڕاستەخۆ ئازاد ناکرێن، بەڵکو لیژنەیەکی دادوەری تایبەت پێکدەهێنرێت بۆ پێداچوونەوە بە دۆسیەکانیان و دووبارە لێکۆڵینەوە لەگەڵیاندا، بڕیاری ئازادکردن یان ئازادنەکردنیان تەنیا لە دەسەڵاتی ئەو لیژنەیە دەبێت.