دادگای پێداچوونەوە بڕیارێك لە بەرژەوەندی دووكانداران دەدات

ئاڤا نیوز

دادگای پێداچوونەوەی هەرێمی كوردستان بڕیارێك لە بەرژەوەندی دووكانداران دەدات و وەرگرتنی پارەی تابلۆی سەر دووكان بە نایاسایی ئەژمار دەكات.

وێنە گەورەكە: دوای ئەوەی هاووڵاتیەك لە دادگای بەرایی هەولێر سكاڵای یاسایی لەدژی هەریەك لە سەرۆكایەتیی شارەوانیی هەولێر و بەڕێوەبەری ڕێگەپێدراوی كۆمپانیای میدیا تیك بۆ تەكنەلۆژیای زانیاری تۆماركرد بەبیانووی نایاسایی وەرگرتنی پارەی تابلۆی سەر دووكان لە دووكانداران، دادگای بەرایی بڕیاریدا بە هەڵوەشاندنەوەی بڕیاری وەرگرتنی پارەی تابلۆ و پابەندكردنی داوالێكراوی دووەم، كۆمپانیای میدیا تیك بۆ تەكنەلۆژیای زانیاری بە جێبەجێكردنی بڕیارەكە، هاوكات بڕیاریدا سەرۆكایەتیی شارەوانیی هەولێر لە داواكە دەربهێندرێت بە بیانووی هیچ پەیوەندییەكی بەم داوایەوە نییە.

نووسراوی فەرمی: وێنەیەكی بڕیاری دادگای پێداچوونەوەی هەرێمی كوردستان لای ئاڤا میدیا پارێزراوە و تێیدا دادگای پیاچوونەوە، بڕیاری دادگای بەرایی هەولێری پەسەند كردووە و دووپاتی لە نایاسایی وەرگرتنی پارەی تابلۆ لە دووكانداران كردووەتەوە.

باكگراوند: زیاتر لە چوار ساڵە وەزارەتی شارەوانیی و گەشتوگوزاری حكومەتی هەرێمی كوردستان، بڕە پارەیەك وەك نرخی تابلۆی دووكان و شوێنە بازرگانییەكان لە دووكانداران و خاوەن كارگە و شوێنە بازرگانییەكان وەردەگرێت كە بەپێی شوێنی ‏تابلۆ و قەبارەكەی دیارییكردووە، تابلۆی سەرەكیی سەر شوێنەكان به‌ 30 هەزار دینار و ‏تابلۆی سەر بیناكان و تەنیشتیان به‌ 20 هەزار دینار دیاریكراون، هه‌روه‌ها تابلۆی ‏لەیزەری یان تەلەڤیزیۆنی به‌ 120 هەزار دینارە.‏ ئەو بڕیارەش ناڕەزایی دووكاندارانی بەدوای خۆیدا هێنا و زۆربەی دووكاندارەكانی ناوچە جیاجیاكانی هەرێمی كوردستان بۆ دەربازبوون لە پێدانی ئەو پارەیە، تابلۆی سەر دووكانەكانیان لێ كردەوە.