مەزڵووم عەبدی: پێویستە سووریا دەستوورێکی هەبێت مافی هەمووانی تێدا دەستەبەر بێت

ئاڤا نیوز

 

مەزڵووم عەبدی، فەرماندەی هێزەکانی سووریای دیموکرات (هەسەدە) ڕایگەیاند، پشتگیری لە هەوڵە نێودەوڵەتییەکان دەکەن بە ئامانجی سەرخستنی پڕۆسەی ڕاگوزەریی سیاسیی لە سووریا.

 

وێنە گەورەکە: حکومەتی سووریا، داوا دەکات هێزە چەکدارەکان لە دەرەوەی دەزگا ئەمنییەکانی سووریادا نەبێت و لە چوارچێوەی وەزارەتی بەرگری سووریا ڕێکیان بخاتەوە، لەبەرانبەریشدا کورد ئامادەیی نیشانداوە لە چوارچێوەی وەزارەتی بەرگری ئەو وڵاتەدا بن بە مەرجی پاراستنی مافەکانیان.

 

لێدوانی فەرمی: مەزڵووم عەبدی، فەرماندەی هێزەکانی سووریای دیموکرات (هەسەدە) ڕایگەیاند: بابەتی باکوور و ڕۆژهەڵاتی سووریا و بەشداری هێزەکانمان لە چوارچێوەی دەوڵەتی سووریا، پێویستی بە ڕێبازێکە کە هاوبەشی نەتەوەیی بهێنێتەوە ئاراوە و ڕەنگدانەوەی فرەچەشنی و نوێنەرایەتی هەموو پێکهاتە و ناوچەکان بکات، هاوکات پێویستمان بە حکومەتێکە نوێنەرایەتی و دەستورێکی دادپەروەرانەی هەبێت کە مافی هەمووان دەستەبەر بکات.

 

باکگراوند: پێشتر ئەحمەد شەیبانی، وەزیری دەرەوەی سووریا ڕایگەیاندبوو، کورد جوانیی و درەوشاوەیی بە هەمەڕەنگی گەلی سووریا بەخشیووە، کۆمەڵگەی کوردییش لە سووریا و لەسەردەستی ڕژێمی ئەسەد ڕووبەڕووی ستەم بووەتەوە و لەگەڵیان کار دەکەین بۆ بونیادنانەوەی سووریا بەجۆرێک هەمووان تیایدا هەست بە یەکسانیی و دادپەروەریی بکەن.