ڕێبوار هادی: هێنانی پێشنیازێک لەلایەن حکومەتەوە بۆ پەرلەمان پێشێلی یاسا و دەستوورە

ئاڤا نیوز

سەرۆکی لیژنەی یاسایی لە پەرلەمانی عێراق ڕایدەگەیێنێت، هێنانی پێشنیازێک لەلایەن حکومەتەوە بۆ پەرلەمان پێشێلی یاسا و دەستوورە و ئاماژەیە بۆ پاشگەزبوونەوەی حکومەت لەو ڕێککەوتنەی سەربارەت بە هەمواری یاسای بودجە کرابوو.

 

وێنە گەورەکە: دوای چەندین دانیشتن و کۆبوونەوەی چڕ، لەماوەی ساڵی 2024 حکومەتی هەرێمی کوردستان و عێراق ڕێککەوتن لەسەر هەموارکردنەوەی ئەو ماددەیەی پەیوەستە بە نەوتی هەرێمی کوردستان، بڕیاردرا، بڕگەی (ج) لە ماددەی 12ـی یاسای بودجە هەموار بکرێتەوە. بەڵام لە دانیشتنی ڕۆژی 21ی ئەم مانگە بەهۆی پێشنیازێکی نوێنەری حکومەت لە پەلەمان ئەو بڕگەیە لە خشتەی کاری پەرلەمان دەرهێنرا.

 

بۆچی گرنگە: بەگوێرەی هەمواری بڕگەی (ج) ماددەی 12 لە یاسای بودجە، تێچووی بەرهەمهێنان و گواستنەوەی نەوتی کوردستان لە 6 دۆلارەوە بۆ 16 دۆلار زیاد دەکرێت، لەسەر ئەو بنەمایەش بڕیارە هەناردەی نەوتی هەرێمی کوردستان ڕاستەوخۆ دەستپێبکاتەوە.

 

لێدوانی فەرمی: دکتۆر ڕێبوار هادی، سەرۆکی لیژنەی یاسایی لە پەرلەمانی عێراق لە میانی بەشداریکردنی لە گەشتی هەواڵەکانی کاتژمێر 12:00ی ئاڤا میدیا ڕایگەیاند: لە ڕووی یاسایی و دەستوورییەوە حکومەت پێشێلی یاسا و دەستووری کرد بە ناردنی ئەو پێشنیازە. بەپێی دەستوور ئەنجوومەنی وەزیران مافی ئەوەی هەیە پرۆژە یاسا بنێرێت، ئەو پێشنیازەش حکومەت ناردویەتی بەبێ گەڕانەوە بۆ ئەنجوومەنی وەزیران. حکومەت بە هیچ جۆرێک مافی ئەوەی نییە پرۆژە یان پێشنیاز بنێرێت، بەڵکو ئەمە کاری ئەنجوومەنی وەزیرانە، پێشنیازیش کاری پەرلەمانە نەک کاری حکومەت.

 

پێدراوە ڕاستییەكان: بە گوێرەی پەیڕەوی ناوخۆی پەرلەمان هەر پێشنیازێک پێشکەش بە لیژنەی تایبەتمەند دەکرێت، دەبێت بە لایەنی کەم 24 کاتژمێر بەر لە دەنگدان ئەو پێشنیازە پێشکەش بەو لیژنەیە بکرێت. لە کاتێکدا پرۆژە یاساکە لەناو پەرلەمان بوو، لە کارنامەی دانیشتنەکە بوو دەنگی لەسەر بدرێت.

 

ئەو مانایەی دەیگەیێنێت: بە گوتەی ڕێبواری هادی هێنانی ئەو پێشنیازە پەشیمان بوونەوە بوو لەو پرۆژەیاسایەی کە پێشتر ناردبووی و کاری لەسەر کرابوو، بە ڕوونی دیاربوو کە پەشیمان بووەتەوە، چونکە ڕێککەوتنی لەسەر کرابوو لەنێوان لایەنە سیاسییەکان تەنانەت لە لیژنەی یاسایی دەنگی لەسەر درابوو.

 

چارەسەرەکان: ئەم بابەتە پێویستی بە لێکتێگەیشتنێکی نوێ هەیە لە نێوان حکومەتی هەرێمی کوردستان و حکومەتی فیدراڵی، حکومەتی هەرێمی کوردستان لەو بابەتە دەبێت پێداگر بێت و زۆر بە ڕاشکاوانە لەگەڵ حکومەتی فیدراڵی قسە بکات کە ئەو بابەتە ڕێککەوتنی پێشوەختەی لەسەر کراوە ناکرێت هەموو ڕۆژ لەسەر ئەو بابەتە ڕێککەوتن بکرێت.