ترەمپ داوا لە وڵاتانی عەرەبی دەکات دانیشتوانی غەززە بگوازنەوە وڵاتەکانیان

ئاڤا نیوز

 

دۆناڵد ترەمپ، سەرۆکی ئەمریکا پلانی چۆڵکردن و ڕاگواستنی دانیشتووانی کەرتی غەززەی هەیە، بۆ ئەو مەبەستەش داوایەکی لە وڵاتانی عەرەبی کردووە.

 

لێدوانی فەرمی: دۆناڵد ترەمپ، سەرۆکی ئەمریکا ڕایگەیاند، ئێمە هەموو ئەو وێرانکارییەی لە کەرتی غەززە هەیە، "پاک دەکەینەوە" و ئەگەری هەیە پلانەکە کاتیی یاخوود درێژخایەن بێت.

 

ڕێککەوتنەتەکە بەم شێوەیە: دۆناڵد ترەمپ لەبارەی پلانەکەوە دەڵێت، پێشنیازێک بۆ "پاککردنەوە"ـی کەرتی غەززە هەیە و داوا لە ئوردن و میسر و سەرجەم وڵاتانی دیکەی عەرەبی دەکەم، فەڵەستینییەکانی نیشتەجیێی غەززە بگوازنەوە وڵاتەکانیان، بۆ ئەم مەبەستەش قسەم لەگەڵ شا عەبدوڵلا، شای ئوردن کردووە بۆئەوەی بەشێک لە فەلەستینییەکانی غەززە بە پەنابەر وەربگرێت، چونکە ناوچەکە ڕووبەڕووی وێرانکاریی بوەتەوە. ترەمپ ئاماژە بۆ ئەوە دەکات بۆ هەمان مەبەست پەیوەندیی بە عەبدولفەتاح سیسی، سەرۆکی میسرەوە دەکات.

 

ئەوەی پێشبینی دەکرێت: ترەمپ پشیوانییەکانی بۆ ئیسرائیل دووپات دەکاتەوە و وەک خۆی دەڵێت، پشتیوانییەکانی واشنتن بۆ ئەوەیە بتوانێت بەرگریی لە خۆی بکات لە بەرامبەر گرووپەکانی وەک حەماس، حیزبوڵلای لوبنان و حووسییەکانی یەمەن.

 

لەلایەکی دیکە: لەبارەی زیانەکانی هێرشەکانی ئیسرائیل بۆ سەر کەرتی غەززە، نەتەوە یەکگرتووەکان دەڵێت،'' لەوانەیە 21 ساڵی پێویست بێت بۆ دووبارە بوونیادنانەوەی غەززە، چونکە 50 ملیۆن تۆن پاشماوەی جەنگ لە ناوچەکەدا هەیە ".