نزیکەی 45 هەزار فەرمانبەری سلێمانی لە وەرگرتنی زەوی سوودمەند دەبن

ئاڤا نیوز

 

لە قۆناغی دووەمی دابەشکردنی زەوی بەسەر فەرمانبەراندا، دوای وردبینیکردن لە فۆڕم و ناوی فەرمانبەرانی شایستەدا بۆ وەرگرتنی زەوی، فۆڕمی نزیکەی 45 هەزار فەرمانبەر دەگەڕێنرێتەوە بەڕێوەبەرایەتی گشتیی شارەوانییەکانی سلێمانی و بەپێی زەوی بەردەست و تەرخانکراو بەسەر فەرمانبەراندا دابەشدەکرێت.

 

وێنە گەورەکە: وەزارەتی شارەوانی ناو و فۆڕمی زیاتر لە 180 هەزار فەرمانبەری سەرجەم پارێزگاکانی ڕەوانەی ئەنجوومەنی وەزیران کردووە، بڕیارە لە چەند ڕۆژی داهاتوودا ڕەزامەندییان بگەڕێتەوە و قۆناغی دووەمی دابەشکردنی زەوی لە هەرێمی کوردستان دەست پێبکات، لەو ژمارەیەش نزیکەی 45 هەزار فۆڕمیان فەرمانبەرانی سنووری پارێزگای سلێمانی و هەڵەبجەن جگە لە ئیدارەی ڕاپەرین و گەرمیان.

 

لێدوانی فەرمی: زەردەشت ڕەفیق، وتەبێژی شارەوانی سلێمانی بە ئاڤا میدیای ڕاگەیاند، "ئامادەکاریمان بۆ قۆناغی دووەمی دابەشکردنی زەوی کردووە، لە سێ شوێنی سلێمانی (سۆتکە، تانجەڕۆ و تاسڵوجە) زەوی دابینکراوە، دوای گەڕانەوەی فۆڕمەکان تیروپشک بۆ دابەشکردنیان دەکەین."

 

لەلایەکی دیکەوە:  سه‌ربه‌ست مه‌ولوود، سەرپەرشتیاری تیمی وردبینی و ڕێکخستنی فۆڕمی دابەشکردنی زەوی له‌ وه‌زاره‌تی شاره‌وانی بە ئاڤا میدیای ڕاگەیاند: دەست بە وردبینیکردن بۆ وەزارەتەکانی ئەوقاف، تەندروستی، کشتوکاڵ، خانەنشینان کراوە، بەشێکی زۆری فۆرمەکانیان تەواو بووە، لە ئایندەیەکی نزیکدا تەواو دەکرێن و وەک قۆناغی سێیەم ئاراستەی ئەنجوومەنی وەزیران دەکرێن.

 

ئەمەش بزانە: لە قۆناغی یەکەمی پرۆسەکە هەزار و 600 فەرمانبەر لە سلێمانی زەوییان پێدراوە، لە قۆناغی دووەم فەرمانبەرانی وەزارەتەکانی پەروەردە، ناوخۆ، خوێندنی باڵا و وەزارەتی پێشمەرگە سوودمەند دەبن.